АРДАГЕРЛЕРГЕ ҚҰРМЕТ КӨРСЕТТІ

Биыл еліміз үшін мерейлі мереке ел Тәуелсіздігінің 30 жылдығы Байзақ аудан көлемінде кеңінен аталуда. Әрдайым ардагерлерге деген құрмет еселене түсуде. Айшықты мереке күні аудан әкімі Бақыт Қазанбасов Бурыл ауылдық округінің тұрғыны, «Батыр ана» Мабли Бешли-оглыны арнайы құттықтап барып, сый-сияпат жасады.

Бақыт Алпысбайұлы сегіз қыз бен төрт ұлды тәрбиелеп, өсірген Батыр ананың ғибратты ғұмырын айрықша атап өтіп, құрмет білдірді. 1949 жылы Оңтүстік Қазақстан облысында дүниеге келген ардақты ана Ровное совхозы (бүгінде Бурыл ауылы) келін боп түсіп, көкөніс егумен шұғылданыпты. 25 жыл дала төсінде көкөніс еккен ол қалған уақытта бала тәрбиесімен айналысқан. Сондай-ақ, Мабли Бешли-оглы 4 ұл, 8 қыз тәрбиелеп, олардан тараған 19 немере мен 14 шөбере сүйіп отырған мәуелі бәйтеректей ұлағатты әже.

Өз кезегінде, емен – жарқын әңгімеге көшкен зейнеткер ұлты түрік болса да өзінен тараған төрт ұлына қазақша есімдер бергенін жеткізді. Сондай-ақ, аудан әкіміне аналық ризашылығын білдіре отырып: «Еліміз аман болсын, Қазақстан Республикасы Тәуелсіздігінің 30 жылдығымен құттықтаймын. Ел игілігі жолындағы еңбектеріне табыс тілеймін, абыройлы болыңдар» — деп, ақ батасын берді.

Батыр ананы құттықтай келген аудан басшысының жанында аудан әкімінің орынбасары Болат Сағынбеков, аудан әкімі аппаратының басшысы Еркін Заурбеков, Бурыл ауылдық округінің әкімі Ерлан Аширбеков болды.