1990 жылдың желтоқсанында БҰҰ бас ассамблеясының 45 сессиясында 1 қазан күнін Халықаралық қарттар күні ретінде бекіту мәселесі көтеріліп,1991 жылы алғаш рет аталып өтті. Әр жыл сайын бұл мерекені әлемнің 10 шақты елдері кеңінен мерекелеп, түрлі конгрессте талқылап, конференция мен іс-шаралар арнап, қарияларды құрметтеу мен қоғам арасындағы рөлін нығайту бойынша жұмыстар жүргізіледі. Ал, бұл дата біздің еліміздің оң жамбасына келіп, мерекелік атаулы күндер тізіміне енгізілді. Бұл күнді бекітудегі басты мақсат — құр дабыра емес, жұртшылық жылуын қартайған жандарға бұрып, қажетті бағдарламаларды қариялардың ахуалын жақсартуға бағыттау. Өзінің ілгері буынына қамқорлық танытып, қажетіне қарайласу — Қазақстанның әлеуметтік саясатының басымдық беретін бағыттарының бірі екені даусыз.
Дәл осы Қарттар күні мерекесіне орай аудан әкімі Нұржан Календеров төлебилік Тоқтасын Омбаевтың шаңырағына барып, ақсақалды арнайы құттықтады. Әңгіме барысында Нұржан Сәбитұлы ардагерлердің еліміздің қоғамдық-саяси өміріне белсене атсалысып, жас ұрпақтың бойына отансүйгіштік пен ізгілікті сіңіруіне сүбелі үлес қосып жатқандығын атап өтті. Аудан басшысы Тоқтасын қария мен оның қосағына қонақжай пейілдеріне, жігерлеріне және ерен еңбектеріне алғысын білдіріп, арнайы сый-сияпат табыс етті.
-Бүгін әке-аналарымызға, майдангерлерге, еңбек ардагерлеріне, зейнеткерлерге, қала мен ауылдағы барша қарияларға ризашылық білдіретін мезет. Аға буын облысымыздың озық болуына, ауданымыздың ажарлануына үлес қосты, сол үшін сіздердің көп жылғы бейнеттеріңізге, көрсеткен үлгілеріңізге, пайым-парасаттарыңызға перзенттік пейілмен рақмет айтамын,- деді аудан әкімі.
Тоқтасын Омбайұлы 1942 жылы 10 маусым күні Жиенбет ауылында дүниеге келген қадірлі ақсақал. Ғұмыр бойы ауыл шаруашылығы саласында еңбек етіп, биік белестерді бағындырды. Төгілген тері, жылдар бойы жасаған жемісті жұмысы үшін «Еңбек ардагері» медалімен және ауыл шаруашылығы министрлігінің Құрмет грамотасымен марапатталған.
***
Ауданның аға буын өкілдерін мерекемен құттықтауды аудандық мәслихат хатшысы Жасұлан Әбенов те ұмыт қалдырмады. Ол Көктөбе ауылына барып, осы ауылдың ардагерлер ұйымының мүшесі Жұмали Аслановтың әулетіне бас сұқты.
Жұмали Мухадимұлы 40 жыл бойы «Қазпошта» филиалының аудандық бөлімшесінде байланысшы болып еңбек еткен жан. 2014 жылы құрметті демалысқа шыққанымен, бүгінгі күнге дейін бұқара арасында белсенділік танытып, шаруалардың бел ортасынан табылып жүр. Жұмали қария ұлтаралық достықты нығайту ісіне де ширақ.
Өз кезегінде Жасұлан Әлкенұлы Жұмали Аслановты қарттар күнімен құттықтап, арнайы сыйлық тапсырып, қажымас қайрат, мығым денсаулық тіледі. Ақсақал да көрсетілген құрметке ризашылық білдіріп, алғысын жаудырды.
