Партия бастамасымен қолға алынған «Қарызсыз қоғам» жобасы бүгінде жалпыхалықтық сипатқа ие болды деп сеніммен айтуға болады.
Бастама аясында миллиондаған азаматымыздың тағдырына тікелей әсер ететін ілкімді іс жүргізілді. Мәселен, тұрғындардың қаржылық сауатын арттыруға, олардың қарыздық жүктемесін азайтуға ықпал етілді. Мұның бәрі, түптеп келгенде, қоғамдағы әлеуметтік тұрақтылықтың негізі саналады.
Мемлекет басшысы өз Жолдауларында бірнеше мәрте атап өтіп, лайықты бағасын берген берекелі бастама аясында биыл да ауқымды шаруа атқарылды. Күні кеше жобаның жылдық нәтижесі қорытындыланды. Жиынға партия Төрағасы Ерлан Қошанов арнайы қатысып, «Қарызсыз қоғам» құруға белсене атсалысып жүрген азаматтарға ризашылық білдірді.
Сонымен, нақты нәтижелерге көшсек:
– Тек биылдың өзінде 860 мыңға жуық адам оқудан өтіп, оларға жан-жақты көмек көрсетілді;
– 422 мың азамат несие төлеудің жаңа әрі ыңғайлы кестесіне көшті;
– 258 мыңнан астам борышкердің шоты мен банк карталарындағы арест шешілді;
– 35 мыңға жуық адамның қарызы толығымен есептен шығарылды.
Биыл жоба аясын одан әрі кеңітіп, жаңа тетіктермен толықты. Атап айтқанда:
– Республикалық Call-орталық іске қосылды;
– Мобильді топтар ауыл-аймақты аралап, кеңес беруде;
– qogamfin.kz онлайн-платформасы, WhatsApp және Telegram желілерінде AI-боттар әзірленді.
Осылайша «Қарызсыз қоғам» жобасы азаматтарға қолдау көрсетудің тұтас экожүйесіне қалыптастырып отыр. Партия бұл жобаны алдағы уақытта да жүйелі түрде жалғастыра беруге мүдделі.
Еліміз аман, жұртымыз тыныш болсын!
