«Батамен ел көгереді, жаңбырмен жер көгереді» дейді қазақ даналығы. Қазақ қай заманда да үлкеннен бата алып, «бісмілләсіз» іс қылмаған халық. Содан болар, есте жоқ ескі заманнан бері бата беру қазақтың қанымен біте қайнасып кеткен. Өңірлік ҚХА Ақсақалдар кеңесі өкілдері «Ақ бата» беру игі шарасын қолға алып, кейінгі ұрпаққа ұлағатты іс қылуда.
Жамбыл облысы ҚХА-ның 2023 жылға арналған жұмыс жоспарына сәйкес, ҚХА Ақсақалдар кеңесі мүшелері мектептердегі алғашқы қоңырауға қатысып, оқушыларға «Ақ бата» беру іс-шараларын өткізді.
Облыстық ҚХА Ақсақалдар кеңесінің төрағасы — Асқарбек Сейілханов, Тараз қаласындағы Т.Рысқұлов атындағы №48 орта мектепте, Ақсақалдар кеңесі төрағасының орынбасары — Абдырахман Зайнутдинов, Тараз қаласындағы №4 орта мектебіне, сондай-ақ, Ақсақалдар кеңесінің мүшесі — Юнусов Идрис Месизович Жамбыл ауданы, Жалпақтөбе ауылындағы В.Чкалов атындағы орта мектепке, Жамбыл ауданы, Жамбыл ауылдық округі ақсақалдар кеңесінің төрағасы — Орынбай Рысбаев — Шайқорық ауылындағы орта мектепке барып, оқушыларды жаңа оқу жылының басталуымен құттықтап, ақбаталарын беріп, білім алушыларға сәттілік тіледі.
«Ақ бата» беру іс-шарасы этнос өкілдері тығыз орналасқан облыстағы аудандардың елді-мекендердегі мектептерінде ұйымдастырылды.
Іс-шараның мақсаты — бата беру, жақсылық тілеу арқылы ес жиып қалған жас өспірімдер мен қанатын қомдап қалыптасып келе жатқан бүлдіршіндерге, жалпы жастарға тәрбиенің бірі ретінде тәлім беру, жас ұрпақтың бойына адами қасиеттерді сіңдіру, ұлттық дәстүріміз арқылы үлкенді құрметтеуді дәріптеу, бата арқылы білімде жолдарының ашық болуына тілектестік білдіру.
Қариялар қай кезде де аман болсын!
Саян Тілеужан
