https://turkystan.kz/article/263320-astanada-220-mln-tenge-qaryzy-bar-zurgizusi-ustaldy
Астана қаласының полициясы әкімшілік айыппұлдар бойынша 220 миллион теңге (423,7 мың АҚШ доллары) көлемінде ірі қарызы бар жүргізушіні ұстады, деп хабарлайды turkystan.kz.
Бөгенбай батыр даңғылы бойында TANK маркалы автокөлік тоқтатылды, оның атына 220 миллион теңгеден астам сомаға айыппұл тіркелген.
«Рөлде көлік құралын иеленетін компанияда жұмыс істейтін 40 жастағы елорда тұрғыны болған. Ер адамның жол жүру ережелерін жүйелі түрде бұзып, айыппұл салу туралы қаулыларды елемей келгені анықталды. Көлік арнайы тұраққа қойылды», — делінген хабарламада.
Құқық бұзушыға қатысты атқарушылық іс жүргізу басталды. Істер жеке сот орындаушыларына беріліп, олар қолданыстағы заңнамаға сәйкес, берешекті өндіруді қоса алғанда, тиісті шаралар қабылдайды.
Полиция әкімшілік айыппұлдарды төлеуден жалтару жауапкершіліктен босатпайтынын ескертеді. Жол ережесін бұзған азаматтар айыппұлдарды уақытылы төлеп, жол жүру қағидаларын қатаң сақтауы тиіс.
