Жамбыл облысында облыстық ата-аналар кеңесінің отырысы өтті. Жиынға облыстық прокуратура мен полиция департаментінің өкілдері, сондай-ақ аудандық және қалалық ата-аналар комитетінің төрағасы қатысты.
Кездесу барысында бала тәрбиесі мен қауіпсіздігін қамтамасыз етуде ата-аналар мен мектеп арасындағы өзара байланыс мәселелері талқыланды. Спикерлердің айтуынша, бала тәрбиесі — тек мектептің ғана емес, ең алдымен отбасының басты міндеті. Осы ретте отбасы мен білім беру мекемелерінің бірлесе әрекет етуі жас ұрпақтың тұлғалық және рухани дамуына тікелей әсер ететіні атап өтілді.
Отырыс қорытындысында облыстық ата-аналар кеңесінің жаңа құрамы бекітіліп, төрағалығына Жұбандықова Назима Норманбековна тағайындалды.
Назима Норманбековна — қоғам белсендісі, патриот әрі бес баланың анасы. Ол өңірдегі ата-аналар қауымдастығының жұмысына белсене араласып, отбасы мен білім беру жүйесі арасындағы өзара ынтымақтастықты арттыру бағытында үлгілі бастамаларымен танылған.
Кеңес мүшелері алдағы уақытта ата-аналардың жауапкершілігін арттыру, балалардың құқықтық сауаттылығын көтеру және қауіпсіз білім беру ортасын қалыптастыру бағытында бірлесіп жұмыс істеуге уағдаласты.
