Әлеуметтік желіде Атыраудағы сауда үйінің маңында жүрген түлкінің видеосы тарап жатыр, деп хабарлады Шаңырақ инфо turkystan.kz. сілтемесіне сүйеніп…
Тұрғындардың бірі қарсақ немесе дала түлкісін түнде «Шалқыма» сауда үйінің маңында көрген. Жануар сауда мекемесінің кіреберіс есігіне қарай жүгіріп, бір айналып, қашып кеткен.
Аймақтық «Ақжайық» басылымы оқиғаға байланысты мамандар пікірін жариялады.
– Оның адамнан қорықпауының өзі патология. Түлкі құтыру ауруымен ауыруы немесе қауіпті аурудың, бірінші кезекте оба тасымалдаушысы болуы мүмкін, – деп есептейді облыстық аңшылар мен балықшылар қоғамының бас аңшысы Александр Ивасенко.
Оның айтуынша, жануар әлдебір аңшының ауласынан қашып кеткен болуы да мүмкін.
Атырау аумақтық орман шаруашылығы және жануарлар дүниесі инспекциясының бөлім басшысы Мереке Шалхаров та осы пікірде секілді.
– Түлкінің жылы жерге кіргісі келгендей дүкен есігіне қалай жүгіргеніне назар аударыңыз. Бұл дала түлкісіне ұқсамайды. Тіпті күтімі жақсы. Атырауда экзотикалық, жабайы жануарларды үйде ұстайтындар бар деп естідім, – дейді ол. – Құтыру ауруына келетін болсақ, оны тек зертханалық жағдайда ғана анықтауға болады.
Ал мамандар бірауыздан, қандай жағдайда да жабайы жануарларға қол тигізу, сипау былай тұрсын, оларға ешқашан жақындамау керек деген пікірде.
