Мемлекет басшысы Қасым-Жомарт Тоқаев елдімекендерді газбен қамту туралы: – Газ саласы елдің әлеуметтік- экономикалық дамуында маңызды орын иеленіп отыр. Сонымен бірге еліміз газды жылдан жылға көбірек тұтынуда. Бірақ, газ өндіру қарқыны оған сай емес. Өнеркәсіп өндірістерін газға көшіретін жаңа жобалар іске қосылуда. Көгілдір отын жағатын тұрғындар саны көбейіп келеді. Сондықтан газға деген сұраныс арта түседі. Осы сұранысқа сай әрдайым ұсыныс болуға тиіс, – деп айтқан болатын.
Осы орайда, бүгінгі күні Сарысу ауданының 14 елді мекенін, оның ішінде Жаңатас қаласын табиғи газбен қамту мақсатында 2 ауқымды жоба іске асырылуда. Атап айтқанда:Бірінші жобамен Түркістан облысындағы №18 «Шалдар» АГТС маңындағы магистралдық газ құбырынан Жамбыл облысының Сарысу ауданы Жаңатас қаласына дейін жоғары қысымды газ құбырын салу қарастырылған.
Аталған жоба аясында 98 шақырым (100%) газ құбыры салынып, ағымдағы жылы «ЕвроХим» АГТС салу жоспарлануда.
Жобаның бастапқы құны — 7,7 млрд. теңге.
2023 жылы жобаға түзету енгізіліп, мемлекеттік сараптаманың оң қорытындысы алынды. Жоба 3,5 млрд. теңгеге қымбаттап, жалпы құны 11,2 млрд. теңгені құрады.
2025 жылға аталған жобаны аяқтау үшін облыстық бюджеттен 3,9 млрд. теңге қаралды.Екінші жобаға сәйкес, Сарысу ауданының 14 елді мекеніне жеткізуші және ауылішілік газ құбырларының құрылысы жүргізілуде (Қызылдихан, Маятас, Жайылма, Өндіріс, Саудакент, Игілік, Жанаталап, Уюм, Сыздықбаев, Ақтоғай, Жаңатас, Үшбас, Бүркітбаев, Арыстанды).
Газ құбырының ұзындығы — 362 шақырым, оның ішінде бүгінгі күнге дейін 281 шақырымы салынды.
Жобаның бастапқы құны — 7,774 млрд. теңге.
2023 жылы жобаға түзету енгізіліп, мемлекеттік сараптаманың оң қорытындысы алынды. Жоба құны 5,7 млрд. теңгеге қымбаттады, жалпы құны 13,5 млрд. теңгені құрады.
Жобаның құрылысын аяқтау үшін 6,2 млрд. теңге қаржы қажет етеді.
Бұл жобаны қаржыландыру үшін салалық министрлікке тиісті бюджеттік өтінім ұсынылды (республикалық бюджеттің алдағы нақтылауында қаралады).
«Сең қозғалды» дегендей, ілкімді істерде ілгерілеу бар. Демек, көгілдір отынның келер күні алыс емес.Сакен Мамытов, Сарысу ауданының әкімі
