Аудан әкімі Бақытжан Жәнібеков аудан орталығындағы бірқатар әлеуметтік нысандарды аралап, шешімін күткен мәселелерді көзбен көрді. Нақтырақ айтқанда, әуелі Төле би ауылындағы су құбыры желілері мен су тарату нысандарын және «Батыс» тұрғын аумағын аралады.
Одан әрі 300 орындық Әл-Фараби атындағы орта мектебінің құрылыс жұмыстарының барысын байқады. Құрылысы көпке созылып кеткен білім ошағында бүгінде жұмыс жүйелі түрде жүргізілуде. Жоспарға сәйкес, аталмыш мектеп ағымдағы жылы пайдалануға берілетін болады.
Жиырма мыңнан аса тұрғыны бар Төле би ауылында кейінгі жылдары жол мәселесі біршама жақсара түскен. Десе де, ауыл әкіміне әлі де жөндеу көрмеген көшелерді ретке келтіру, яғни ағымдағы жөндеу мен күтіп ұстау бойынша нақты тапсырма берілді. Дәл осындай жұмыстар өзге де ауылдық округтерде бір жүйеге келтірілуі тиіс. Одан бөлек, жауапты мамандарға канал бойындағы қураған ағаштарды кесіп, тазарту жұмыстарын жүргізу жүктелді. Сонымен қатар, аудан орталығындағы бос тұрған ғимараттарды кәдеге жарату, айналма жолдың бойын жарықтандыру мен абаттандыру сынды мәселелер де жан-жақты талқыланды.
