Аудан әкімі Бақытжан Жәнібеков жұмыс кестесіне сәйкес, Жаңақоғам және Д.Қонаев ауылдарында болып, жергілікті тұрғындармен кездесті. Еркін пікір алмасу барысында ауылдықтар елді мекенге қатысты түйткілді мәселелерді атап, оның шешілуіне атсалысуды сұрады.
Басқосу барысында қос ауылдың азаматтары ортақ бір мәселені көтерді. Ол — ағын су мәселесі. Қазіргі кезде егістік алқаптарындағы шаруалар бел жазбай еңбек етіп, мол өнім алудың қамымен жүргені белгілі. Бұл ретте ағын суды алқапқа дер кезінде жеткізудің маңыздылығы жоғары. Сол себептен де тұрғындармен ағын суды уақытымен пайдалану, егістікке жеткізу сынды бірқатар мәселелер талқыланды. Сондай-ақ, Жаңақоғам ауылдық округінің ішкі ағын су жүйесіне, ауыз суға қатысты мәселесін шешудің тетіктері қарастырылып, нақты шешімдер қабылданды.
Ал Д.Қонаев ауылының ақсақалдары ағын судан бөлек, аудан орталығына қатынайтын қоғамдық көлік пен “Ауыл аманаты” жобасына байланысты сауалдарын қойды. Аталған мәселеге қатысты жан-жақты түсіндіру жұмыстары жүргізіліп, сұрақтарға жауап берілді.
