istockphoto.com
Қазақстанда кофе бағасы бір жылда 26 пайызға қымбаттаған: 19 қаңтар 2026, жаңалықтар Turkystan.kz
Қазақстанда кофе бағасы қарқынды түрде қымбаттауды жалғастырып жатыр. Стратегиялық жоспарлау және реформалар агенттігінің Ұлттық статистика бюросының дерегіне сәйкес, өткен жылдың желтоқсан айында таңғы негізгі сусын саналатын кофенің бағасы бір жылда 26 пайыздан астам өскен. Бұл – соңғы 12 айдағы ең жоғары көрсеткіш, деп хабарлайды turkystan.kz.
Бағаның мұндай күрт өсуі Қазақстанның ішкі саудасына ғана тән құбылыс емес. Негізгі себеп – шетелдік жеткізушілер тарапынан туындаған факторлар. Кофе әлем бойынша қымбаттаған. Мұны Trading Economics халықаралық порталының деректері де растайды. Атап айтқанда, 2025 жылдың желтоқсанында әлемдік биржада бір фунт кофе 4,1 АҚШ долларына бағаланған. Бұл 2024 жылдың қаңтарымен салыстырғанда 28 пайызға жоғары.
Әлемдік бағаның өсуіне басты себеп – өндіруші елдердегі климаттық өзгерістер. Өткен маусымда арабика кофесінің негізгі жеткізушісі саналатын Бразилияда құрғақшылық тіркелді. Ал Вьетнамда 2025 жылдың жазындағы аптап ыстық робуста өнімінің көлемін азайтқан.
Қазақстан үшін кофе – толықтай импортталатын өнім. Бұл тауар елімізге 47 елден жеткізіледі, ал негізгі жеткізуші ретінде Бразилия қала беріп отыр. Ұлттық статистика бюросы жариялаған кедендік деректерге сәйкес, өткен жылдың қаңтар–қазан айларында Бразилияның Қазақстанға импортталған кофедегі үлесі шамамен 40 пайызды құраған. Осы кезеңде бразилиялық арабика плантацияларынан 1,5 мың тоннаға жуық кофе жеткізілген. Бұл – бір жыл бұрынғы көрсеткіштен 1,5 есе көп.
Импорт көлемі бойынша екінші орында Ресей тұр. 2025 жылдың қаңтар-қазан айларында бұл елден Қазақстанға шамамен 938 тонна кофе жеткізілген, бұл өткен жылмен салыстырғанда 18 пайызға артық.
2024 және 2025 жылдардың алғашқы 10 айындағы жеткізуші елдер құрылымын салыстыру қызықты үрдісті көрсетіп отыр. Өткен жылы Қазақстан кейбір Азия елдерінен кофе импортын едәуір арттырған. Атап айтқанда, Вьетнамнан жеткізілім көлемі үш еседен астам, ал Қытайдан шамамен 44 есеге өскен. Бұл Қазақстанның бразилиялық бағытқа балама импорт арналарына бет бұра бастағанын аңғартады.
Толық нұсқасына гиперсілтеме беруді ұмытпаңыз: https://turkystan.kz/article/274782-qazaqstanda-kofe-bagasy-bir-zylda-26-paiyzga-qymbattagan
