Қазақстанда криптовалюта сатып алып, сатуға заңды түрде рұқсат беретін жаңа заң жобасы әзірленіп жатыр. Бұл туралы Ұлттық банк төрағасының орынбасары Берік Шолпанқұлов брифинг барысында мәлім етті, деп хабарлайды Anyqtime.kz тілшісі Stan.kz сайтына сілтеме жасап.
Оның айтуынша, әзірленіп жатқан түзетулер екі негізгі бағытқа негізделген. Біріншіден, цифрлық қаржылық активтердің құқықтық мәртебесі айқындалып, олардың заңды түрде іске қосылуы қамтамасыз етіледі. Екіншіден, криптовалюта айырбастайтын платформаларды лицензиялау арқылы реттеу жүйесі енгізіледі.
Сонымен қатар, Ұлттық банк цифрлық технологиялар мен қызметтерді сынақтан өткізуге арналған арнайы платформа әзірлеп жатқанын айтты. Бұл бастама жаңа қызмет түрлерін қауіпсіз жағдайда енгізуге мүмкіндік береді.
Естеріңізге сала кетейік, бұған дейін цифрлық даму министрінің бірінші орынбасары Қаныш Төлеушин 2025 жылдың соңына қарай цифрлық активтер нарығының толықтай заңдастырылатынын хабарлаған еді.
Жаңа ереже бойынша қарапайым азаматтар криптовалюта активтерін тек «Астана» халықаралық қаржы орталығында тіркелген және Ұлттық банктен лицензия алған компаниялар арқылы сатып алып, сата алады. Бұл өзгеріс криптовалюта қозғалысын заңды түрде бақылауға мүмкіндік беріп, қаржы ағынын ашық етпек.
Майнинг саласына да өзгеріс күтіліп отыр. Үлкен майнинг компанияларына жеке электр станцияларын салып, дербес қуат көзін пайдалану құқығы берілуі мүмкін. Бұл олардың тұрақты әрі табысты жұмыс істеуіне жол ашады.
https://anyqtime.kz/article/169-qazaqstanda-kriptovaliuta-saudasyna-zandy-ruqsat-beru-qarastyryluda?fbclid=IwY2xjawKcDZFleHRuA2FlbQIxMABicmlkETFwMVJ2Tmh2V1FlWVlYR0tPAR7KpmlEfTK1EU083CRuvs3szv8YFaVmnhN9HP1hJu_5ROnXSK16dVvvs8cvKA_aem_dybRL3Y3vxIeFC4oiEQosA
