Мемлекет басшысының мемлекеттік қызметке кірудегі артық кедергілерді жою және орналасу тәртібін жеңілдету бойынша тапсырмасына сәйкес «ҚР Мемлекеттік қызметі туралы» ҚР Заңыңа өзгерістер мен толықтырулар енгізіліп, 2023 жылдан бастап жас мамандарға мемлекеттік қызметке орналасу мүмкіндігі жеңілдетілді.
Нақты айтқанда, Мемлекеттік грант есебінен жоғары білім алып, оқуды жақсы нәтижемен (GPA 3.33 төмен емес) аяқтап, диплом алғаннан соң бір жыл ішінде келесі мемлекеттік әкімшілік лауазымдарға конкурссыз орналасу мүмкіндігі қарастырылған болатын.
Бұл мемлекеттік органдардағы төменгі лауазымдар:
- облыс ауданының әкімі және мәслихаты аппараттарының төменгі лауазымына;
- жергілікті бюджеттен қаржыландырылатын облыс ауданының атқарушы органының басшылық емес лауазымына;
- аудандық маңызы бар қала, ауыл, кент, ауылдық округ әкімі аппаратының басшылық емес лауазымына;
- орталық мемлекеттік органның және оның ведомствосының аудандық бөлімшесінің басшылық емес лауазымына.
Конкурссыз тағайындалу шарттары:
- Білім негізі: Мемлекеттік білім беру тапсырысы (грант) бойынша оқу.
- Үлгерім: GPA орташа балы 3,33-тен төмен болмауы тиіс.
- Уақыт шектеуі: Оқуды бітіргеннен кейін 1 жыл ішінде.
- Келісім: ҚР Мемлекеттік қызмет істері агенттігінің аумақтық департаментінің келісімі.
Бұл жеңілдік жас мамандарды жұмыспен қамту және мемлекеттік қызметке тарту мақсатында уәкілетті органның келісімімен жүзеге асырылады.
Сондай-ақ, білікті жастарды мемлекеттік қызметке ынталандыру, өңірлердегі кадр тапшылығын шешу үшін қабылданған норма.
Қазақстанда жастар үшін мемлекеттік қызмет — бұл кәсіби өсуге, тұрақтылыққа және ел дамуына үлес қосуға арналған мансаптық мүмкіндіктер.
Осы мүмкіндікті пайдалана отырып, 2023 жылдан бастап Жамбыл облысы аумағындағы мемлекеттік органдарға 55 жас маман аудандық деңгейлердегі басшылық емес лауазымдарға конкурссыз қабылданған.
Оның ішінде, ҚР Мемлекеттік қызмет істері агенттігінің Жамбыл облысы бойынша департаментімен 2023 жылы 5 түлекке, 2024 жылы 28 түлекке, 2025 жылы 22 түлекке мемлекеттік қызметке қабылдануға келісім берілген.
