Ал желіде жұрт оларға жаппай бойкот жариялап жатыр.
Қазақстандықтар әуелі Beeline компаниясының “Үй интернеті” қызметінің айлық абоненттік төлемі күрт өскенін айтты. Жазбада төлем мөлшерінің 19 039 теңге болатыны көрсетілген. Бұл бұрынғы тарифпен салыстырғанда шамамен 4 мың теңгеге жоғары.
Олар бұдан бөлек Tele2-нің де тарифті қымбаттатқанын айтты. Олардың бірінің пікірінше, 1 290 теңгеден басталған тариф биыл 25 желтоқсаннан бастап 7 290 теңгеге көтерілмек. Бір қызығы, Tele2 биыл тариф бағасын екі рет көтерген. Ондағы бір тариф түрі ақпанға дейін 5 090 теңге болса, 29 наурыздан бастап 6 290 теңгеге жоғарылаған. Ал тағы бір желі қолданушысы 1 айда үй интернетіне 45 000 теңге жұмсайтынын айтты.
Аталған жағдайға Beeline, Tele2 ұялы байланыс операторлары ресми пікір білдірді. Beeline келер жылы 1 қаңтардан бастап тариф құны айтарлықтай өсетінін мәлімдеді. Ал Tele2 тарифтік жоспарлардың бағасын қайта қарайтынын мәлімдеді. Оның үстіне тариф өзгерістері қызмет сапасын сақтауға мүмкіндік береді дейді. Осылайша олар тариф бағасы биыл 25 желтоқсаннан бастап өзгеретінін жеткізді.
Операторлардың мәліметінше, бағаны көтеруге Қосылған құн салығы мөлшерлемесінің артуы себеп болған.
Десе де желі қолданушылары “сапасы нашар интернет үшін не себепті көп қаржы төлеуіміз керек” деген пікірінен танбай отыр.
