Қазақстанның өңірлерінде «Жер–2025» республикалық командалық-штабтық оқу-жаттығулары өткізілуде
Аталмыш оқу-жаттығу 23 шілде сағат 08:00-де «Дабыл-1001» сигналымен басталды.
Шымкент қаласында көрші облыстардың (Жамбыл, Түркістан, Қызылорда) қатысуымен “ЖЕР-2025″ республикалық командалық-штабтық оқу-жаттығуы өтуде.
ТЖ департаментінде Жедел штаб өрістетілді. Төтенше жағдайлар жөніндегі комиссияның жоспардан тыс отырысы ұйымдастырылып, ТЖ жою жоспарына сәйкес, Шымкент қаласына Жоспарда көрсетілген күш пен құралдарды жөнелтуге шешім қабылданды.
Оқу-жаттығуды өткізу және дайындау жөніндегі ұйымдастырушылық нұсқаулыққа сәйкес, Шымкент қаласының Еңбекші ауданы аумағында жойқын жер сілкінісінің салдарын жоюға Жамбыл облысынан 2-ші эшелонмен 500 адам, 100 бірлік техника және Жамбыл облысының ТЖ департаментінен 191 жеке құрам мен 16 бірлік техника дайындыққа келтіріліп, Шымкент қаласына жолданды.
Авариялық-құтқару және кезек күттірмейтін жұмыстарды жүргізу, күш және құралдардың әрекетін үйлестіру үшін алдын ала белгіленген Шымкент қаласы Еңбекші ауданында шатырлы қалашығы өрістетілді.
Еңбекші ауданының аумағы 228 шаршы шақырым (22,8 мың га). Халық саны – 228 830 адам. Ауданда 130 білім беру нысаны, 4 денсаулық сақтау ұйымы, 11 шағынаудан, 2 әлеуметтік нысан, 2 түзеу мекемесі және адамдар жаппай жиналатын 25 нысан орналасқан.
Авариялық құтқару және кезек күттірмейтін жұмыстарын жүргізуге аудан 9 секторға және 18 учаскеге бөлінген.
Еңбекші ауданында химиялық қауіпті заттарды қолданатын және сақтайтын 4 химиялық қауіпті нысан орналасқан:
Анықтама: «Шымкент сыра зауыты» ЖШС – 4,2 тонна аммиак, «Еврокристал» ЖШС – 90 литр тұз қышқылы, «Petro Kazakhstan Oil Products» ЖШС – 1,2 тонна аммиак, «Шымкент Сүт» ЖШС – 0,3 тонна аммиак.
Инженерлік барлау күштері мен құралдарымен жолдардың жағдайы, авариялық-құтқару жұмыстары жүргізілетін нысандардың жай-күйі, жолдарды тазарту мен нысандарға өту мүмкіндігі, коммуналдық және энергетикалық желілердегі зақымдану ошақтары, су жүйелерінің сақталған бөліктері анықталды.
Магистральдық, қалалық және аудандық газ құбырлары түрлі дәрежеде, гидротехникалық құрылыстар («Бадам» және «Тоғыс» су қоймалары), «Бадам» және «Сайрам» өзендері шамалы зақымдалған.
Қалалық коммуналдық-энергетикалық желілері мен құрылыстарында, газбен жабдықтау объектілерінде, 26 жанар-жағар май құю және 40 газ құю бекеттерінің қирауы нәтижесінде жекелеген өрт орын алды.
Қалыптасқан жағдайға байланысты Жамбыл облысының күш және құралдарымен авариялық-құтқару жұмыстарын жүргізу ұйымдастырылды.
Анықтама: Жамбыл облысы азаматтық қорғау құрылымдарының күштері мен құралдарын жөнелту уақыты – «С+4 сағат», ал авариялық-құтқару жұмыстарының басталу уақыты – «С+24 сағат». Орналасатын орын – Шымкент қаласы, Еңбекші ауданы.
Оқу-жаттығу барысында Еңбекші ауданының ТЖ бөлімімен бірлесіп, облыстық күштер тобының апаттық-құтқару жұмыстарын жүргізу бағыттары мен басқару пункттерінің орналасатын жерлері нақтыланды.
«Жер–2025» оқу-жаттығулары табиғи апат жағдайындағы іс-қимылдарға кешенді дайындықты бағалауға, барлық құрылымдар арасындағы үйлесімділікті арттыруға және халыққа жер сілкінісі кезіндегі жүріс-тұрыс қағидаларын үйретуге мүмкіндік береді.
Қанатбек Мәдібек, Жамбыл облысы әкімінің орынбасары
