«Көрші ақысы – тәңір хақысы» деп дана халқымыз айтқандай, қазіргі таңда қырғыз бен қазақ халқының арасындағы достық пен бауырмашылдық күн санап артып келеді. Соның тағы бір дәлелі күні кеше ғана Қырғызстанның белсенді жастарының қатысуымен «Жаңа толқын 100+» атты облыс әкімі аппаратының «Қоғамдық келісім» мекемесінің ұйымдастыруымен ауыл жастарының форумы өтті.
Ақбас Алатаудың қос етегін мекендеген қазақ пен қырғыз ежелден төскейде малы, төсекте басы қосылған бауырлас халықтар. Қос халықтың тұрмыс – тіршілігінде, мәдениеті мен өркениетінде, салт-дәстүрінде біршама ұқсастықтар бар. Айыр қалпақты ағайынмен қазақ халқының ертеден келе жатқан рухани байланысы да аз емес. Ұлы ғалым Шоқан Уәлихановтың «Ыстық көл сапарын» жазуы, «Манас жырын» қағазға түсіруі, Сүйінбай мен Қатағанның айтысы, көрнекті жазушы Шыңғыс Айтматовтың әйгілі Мұхтар Әуезовке шәкірт болуы, Жамбыл мен Тоқтағұл есімдерінің қатар аталуы да достығымыздың дәлелі.
Бүгінде ата-бабадан қалған дәстүрді дәріптеу – біздің парызымыз. Осы мақсатта Меркі ауданындағы «Ақ ниет» шипажайында Қазақстан мен Қырғызстанның белсенді жастары бас қосты. «Жаңа толқын 100+» ауыл жастарының форумына И. Арабаев атындағы КМУ-дың онға жуық аспиранттары арнайы келіп қатысты.
Форум қырғыз елінен келген жастарды Сыпатай батыр кеденінен күтіп алудан басталды. «Жаңғыру жолы» жастар қозғалысының «Ұлы дала елінің киелі мұрасы» жобасына сәйкес Қырғызстаннан елімізге ат басын бұрған қонақтарды бұрнағы кезі «Ұлы жібек жолы» саналған жолдың бойында орналасқан Сыпатай батыр кесенесіне алып барып, батырдың өмірі мен ерліктерінен сыр шертілді. Одан әрі қонақтар Меркі аудандық тарихи-өлкетану музейін аралады. Онда олар Меркі табиғаты, қазақтың ежелден келе жатқан құрал-сайман, ұлттық нақышта тігілген киімдер, әшекей бұйымдар, халқымыздың байырғы тұрмыста қолданған заттары, Меркі жерінен шыққан белгілі тұлғалар, тәуелсіздік таңындағы Қазақстанның келбеті, Отырар қаласынан (ежелгі Фараб) табылған құнды жәдігерлер, Тұрар Рысқұловтың өмірі жайлы деректер сынды рухани қазына болар дүниелермен танысты. Экскурсияның соңы Ботпай баба кесенесін тамашалаумен аяқталды.
Бұдан кейін «Ақ ниет» шипажайында Қырғызстанның белсенді жастарының қатысуымен «Жаңа толқын 100+» атты ауыл жастарының форумының ашылу салтанаты болды. Шарада облыстық Қазақстан халқы Ассамблеясы хатшылығының бас маманы Ұлтуар Бабақұлова, облыс әкімі аппаратының «Қоғамдық келісім» мекемесінің басшысы Рано Убайдуллаева және И.Арабаев атындағы КМУ аспиранты Азамат Айдаров сөз алып, екі ел арасындағы бауырмашылдық байланысты айта келе, форумның ашылуымен көпшілікті құттықтады.
Одан соң «Болашақ» вокалдық триосы мен Меркі ауданының өнерпаздары концерттік бағдарлама ұсынып, әр ұлттың билерінен шашу шашылды.
«Жаңа толқын 100+» форумының екінші күні таңғы жаттығумен басталды. Жастар бойын сергітіп алғаннан кейін, Ғылыми сараптамалық бөлімнің ұйымдастыруымен Гулгина Гизатулина мен Альбина Тапаева «Қоғам бірігуіндегі тіларалық байланыс ролі» тақырыбында семинар- тренингін өткізді. Тренинг қонақтар мен жастардың белсенділіктерін оятып, ойларын еркін жеткізуге деген сенімділіктерін арттырды. Ал медиация тақырыбы бойынша жастарды дау-жанжалдың алдын алуға арналған келісімі туралы Меркі ауданының медиаторы Шынар Хамирова дәріс оқыды. Сондай-ақ жастарды «100 жаңа есім» жобасымен таныстыру да назардан тыс қалмады. Елбасының «Болашаққа бағдар: рухани жаңғыру» атты бағдарламалық мақаласындағы жастардың үлгі алуына, заманауи Қазақстанның келбетін танытуға мүмкіндік беретін «100 жаңа есімнің» жамбылдық жеңімпаздарын облыс әкімі аппаратының баспасөз қызметі бөлімінің БАҚ пен жұмыс менеджері Назерке Оңғар таныстырды. Осы тұста қырғыз елінің белсенді жастарына жетекшілік етіп келген Айдаров Азамат сөз алып, ол еліміздегі жастардың белсенділігін арттыруда әр сала бойынша жасалып жатқан жұмыстардың сапалылығын және медиациямен жұмыс істеудің тиімділігін, өздерінің осында келіп тәжірибе алмасқандарына шексіз разы екендерін тілге тиек етті. Форумның екінші күнінің соңында қазақ халқының «Табақ тарту» рәсімі көрсетіліп, дәстүрлі әндер дәріптелді.
Форумның соңғы күні Біржан Уксикбаев, Рахат Ерханұлы, Азамат Назаровтың ұйымдастыруымен спорттық ойындардан турнир өткізілді. Жастар мұнда бильярд пен теннистен бәсекелесті. Жарыс соңында қонақтар мен облысымыздың белсенді жастарына Алғыс хат пен естелік сыйлықтар табыс етілді.
Осылайша қырғыз-қазақ жастары рухани азық болар кездесу өткізіп, екі ел арасындағы байланысты берік ете түсті.
«Ұлы шаңырақ»-ақпарат
