Республика күні — Жоғарғы Кеңестің, Қазақстанның Мемлекеттік егемендігі туралы декларацияны қабылдаған күні, яғни 1990 жыл 25 қазан. Халықтың шешімі, қоғам қалауы Республика күні — елдіктің мерекесі. Ата-бабамыз ғасырлар бойы армандап өткен тәуелсіз ел болу мәртебесін көру – бүгінгі ұрпаққа бұйырған зор бақыт екені анық.25 қазан — Республика күніне орай, бүгін аудандық мәдениет үйінде салтанатты жиын өтті. Салтанатты шара Қазақстан Республикасының Мемлекеттік Гимнімен ашылды. Аудан әкімі Сәкен Мамытов жиылған жұртшылықты қастерлі мерекемен құттықтап, мәңгілік ел мұраты болған Тәуелсіздігіміздің тұғырлы болуын тілектестігін білдірді. Ауданымыздың экономикалық дамуына сүбелі үлесін қосып бірқатар сала мамандары мен ардагерлері «Жамбыл облысына сіңірген еңбегі үшін» төсбелгісімен, Жамбыл облысы әкімінің, Сарысу ауданы әкімінің Құрмет грамоталары мен Алғыс хаттарымен және «Ауданға сіңірген еңбегі үшін» төсбелгісімен марапатталды.Сонымен қатар, аудандық мәслихат төрағасы Шаттық Мұсабеков пен «AMANAT» партиясы аудандық филиалының төрағасы Мұратбек Есмұрзаев та бірқатар азаматтарға аудандық мәслихаттың және партияның аудандық филиалының Құрмет грамоталары мен Алғыс хаттарын тапсырды.Аталмыш мерекеде Сәкен Сейфуллин (қазіргі Д.Қонаев) орта мектебінің 1986 жылғы түлектерінің демеушілігімен мерекеге орай, эстрада жұлдыздары Жанболат пен Жазира әуелете ән шырқап, көпшіліктің ықыласына бөленді. Сонымен қатар, аудандық мәдениет үйінің әншілері патриоттық рухта ән айтса, «Айжанқыз» халықтық бишілер ұжымы мың бұрала билеп, салтанатты кештің көркін келтірді.