Елбасымыздың «Біз кез келген ұлттың түп-тамыры ауыл жұртында жататынын естен шығармауға тиіспіз» деген сөзі өте орынды айтылған. Елеулі жылда ел еңсесін тіктеуге ел бесігі саналатын ауылдардың мемлекетке қосқан үлесі телегей-теңіз. Бұл сөзімді ешкім жоққа шығара алмас. Күнделікті күйбеңі еңбекпенен астасқан ауылдарымызды қалай дәріптесек те жарасымды.
Мемлекет басшысы Қасым-Жомарт Тоқаев жуырда жарық көрген «Халық бірлігі және жүйелі реформалар-ел өркендеуінің берік негізі» атты Жолдауында «Ынтымақ жүрген жерде ырыс бірге жүреді» деп халқымыз бекер айтпаған. Біздің күш-қуатымыз-берекелі бірлікте! Ендеше, бірлігімізді бекемдеп, ел үшін еңбек етейік!» деген болатын.
Байқап қарасақ, Елбасымыздың да, қазіргі Президентіміздің де жыл сайынғы жүйелі Жолдауларының әр жолында «бірлік» сөзі текке қолданылмаған. Сайып келгенде, әр бастаған тірлігіміз бірлікпен үндеспесе, белестерге шығуымыз екіұдай. Бірнеше ұлтты топтастырған ауылымыздың бірлігі бекем, тірлігі көркем. Өңірді өркендететін қашанда өнеркәсіп. «Kaz Ir Agro» ЖШС-нің сұйық май өнімдерін шығаратын зауытының бірі біздің Бірлік ауылында орналасқандығын марқая айта жүреміз. Сафлор майын өндіретін зауыт сауапты іске келгенде де тартынып қалған емес. Ауылдың жомарт азаматтарымен бір кісідей қайырымдылықтың үлгісін көрсетіп жүр. Ауылдықтарды жұмыспен қамтып отырғаны тағы бар.
Берері мол мемлекеттік бағдарламалардың игілігін бірліктіктер де көріп жатыр. Үстіміздегі жылы ауыл бюджетінің есебінен «Жастар», «Құрылыс» көшелеріне түнгі жарықтандыру жүргізілді. «Өңірлерді дамыту» бағдарламасы бойынша «Тұран» көшесіне 300 метр жолға асфальт төселді. Ауыл азаматтарының демеушілігімен 150 орындықты мешіт асханасының құрылысы жүргізіліп жатыр. «Жұмыспен қамту жол картасы» бағдарламасы аясында кіші футбол алаңы салынып, ауыл тұрғындарының игілігіне берілді. Міне, мұның бәрі тәуелсіздіктің арқасында тындырылып жатқан тірліктер. Алдағы күннің еншісіне қойылған жүйелі жоспарларымыз да ойдағыдай іске асады деп сенемін. «Төрде басы, төскейде малы қосылған» ауылымызда бірлігі жарасқан бірнеше ұлт өкілдері біте қайнасып күн кешуде. Ынтымағы жарасқан елдің ырысы артады демекші, өскен, өнген өлкенің өресі биік, өрісі кең болсын!
Ербол ҚОСАХОВ,
Бірлік ауылдық округінің әкімі.
