Қазығұрт ауданына қарасты Қызылқия ауылдық округінде ауыл шаруашылығы саласында заманауи тәсілдерді қолдану арқылы қарқынды жұмыстар жүргізілуде.
Әсіресе, су ресурстарын үнемдеп пайдалану бағытында жаңа технологиялар енгізіліп, өнімділікті арттыруға ерекше назар аударылған.Осы орайда, аудан әкімі Азизхан Исмаилов арнайы жұмыс сапарымен «Юг Агро-777» жауапкершілігі шектеулі серіктестігінің жұмысымен танысып, егістік алқаптарын аралады. Сапар барысында әкім ауыл шаруашылығын әртараптандыру, жаңа технологияларды кеңінен енгізу, сондай-ақ заманауи агротехникалық талаптарды сақтау қажеттілігіне тоқталып, шаруашылық қызметкерлеріне сәттілік тіледі.
Бүгінде аталған шаруашылықта 18 гектар жерге қырыққабат, 3,5 гектарға қызылша, 3,5 гектарға болгар бұрышы егілген. Жалпы шаруашылықтың 40 гектары — суармалы егістік, ал 15 гектары — жайылымдық жер. Мұнда агротехникалық талаптарға сай жұмыстар жүйелі түрде жүргізіліп, жергілікті тұрғындар жұмыспен қамтылып отыр. Бұл — ауыл шаруашылығын дамытудың және жаңа технологияларды енгізудің нақты көрінісі.
Түркістан облысының Ауылшаруашылығы басқармасы
