Облыс әкімінің орынбасары Сұлушаш Құрманбекованың төрағалығымен «Рухани жаңғыру» бағдарламасының жүзеге асырылуы бойынша арнайы кеңес отырысы өткізілді. Селекторлық режимде өткен жиынға барлық аудан әкімдерінің орынбасарлары мен ішкі саясат бөлімдерінің басшылары қатысты, – деп хабарлайды «shanyraqinfo.kz» ақпарат агенттігі.
Кеңесте облыстық «Рухани жаңғыру» офисінің басшысы Серікбол Берікқожа 6 айдың қорытындысы бойынша есеп берді. Серікбол Қайратұлының айтуынша, есепті кезеңде жүргізілген мониторингке сейкес барлық бағыттар бойынша 59 жоба, 648 іс-шара өткізіліп, оған 271 мыңнан астам адам қамтылған.
– «Қазақстандағы 100 жаңа есім» арнайы жобасы аясында барлығы 2 733 адамды қамтыған 24 іс-шара өткізілді. Облыс әкімдігінің басқармалары бойынша: аталған жоба аясында жастар саясаты мәселелері басқармасы (120 адамның қатысуымен 2 іс-шара), мәдениет, архивтер және құжаттама басқармасы өткізген. Басқа басқармалар мен ЖОО тарапынан есепті мерзімде іс-шаралар ұйымдастырылмаған. Тараз қаласы мен аудандар арасында жоба аясында Тараз қаласында 14 іс-шара өткізіліп, 1773 адам қамтылса, Меркі ауданында 480 адамның қамтылуымен 3 іс-шара, Т.Рысқұлов 200 адамның қатысуымен 1 ғана шара ұйымдастырса, Байзақ, Жамбыл, Жуалы, Талас, Сарысу, Мойынқұм, Шу, Қордай аудандарында ешқандай жұмыстар жүргізілмеген, -деді Серікбол Берікқожа.
Облыс әкімінің орынбасары Сұлушаш Құрманбекова «Рухани жаңғыру» бағыты бойынша жергілікті жерлерде атқарылып жатқан жұмыстарға көңілі толмайтынын айт келе, «Қазақстанның киелі жерлерінің географиясы», «100 жаңа кітап», «100 жаңа есім», «Ауыл – ел бесігі!» арнайы жобаларды бойынша аудандардың белсенділігі өте төмен екенін, шараларға халықты қамту жағы бәсең екенін тиек етті. Жиын барысында Шу, Т.Рысқұлов, Мойынқұм ауданы әкімі орынбасарларын онлайн байланыс арқылы тыңдап, оларға жұмысты ширатуды, «Рухани жаңғыру» бағдарламасының орындалуын бақылайтын арнайы маманды бекітуді тапсырды.
Жиынды қорытындылаған Сұлушаш Сәтбекқызы «Рухани жаңғыру» бағытындағы жұмыстардың бұқаралық ақпарат құралдарында жариялану деңгейіне арнайы тоқталып, осы күнге дейін 875 мақала жарық көргенін, алайда сапасы сын көтермейтін дүниелер бар екенін айтып, басқарма мен аудандардың бірінші басшылары, орынбасарлары мақаланы қызметкерге жүктемей, өздері жазуы керектігін ескертті. Сондай-ақ, ол Елбасының «Рухани жаңғыру» бағдарламасын және «Ұлы даланың жеті қыры» мақаласын БАҚ беттерінде қамтуда облыстық газеттердің бас редакторлары мен жергілікті телеарна директорларын белсенді болуға шақырды.
