«Әулиелер Алланың жердегі нұры» деген. Рухани ұлылығымен, діндарлығымен, әулиелігімен, даналығымен, батырлығымен ерекше өнегелі ісімен қасиет қонған Тұлғалар ел жадында мәңгі қалған Әулиелерге айналған.
Солардың бірі Қарабура әулие.
Қазақ даласында Қарахан мемлекеті бой көтергенде оның бекіп, нығаюына Қарабура баба өшпес із қалдырған. Қарабура бабамыз Орта Азияда ислам дінінің орнығуы үшін Қожа Ахмет Яссауимен тізе қоса аянбай еңбек еткен.
Қожа Ахмет Яссауи өзін жерлеуді, жаназасын шығаруды Қарабура бабаға аманаттаған екен. Осыдан-ақ, бұл кісінің өз заманында аса жоғары беделге ие болғанын көреміз.
Қарабура әулие қазаққа ғана емес, күллі түркі жұртына ортақ тұлға!
Қазіргі таңда әулиенің Созақтағы кесенесі Орта Азия халықтары үшін киелі орынға айналған.
Өткен сенбі күні бір топ сарысулықтар әулиелер мекені, қасиетті Созақ өңіріне барып, Қарабура әулие бабаның рухына тағзым етіп, баба рухына арналған асқа қатысып қайтты.
Әулие кесенесінің жанындағы Сарысу ауданының қонақ үйінде екі күн бойы алыстан келген қонақтарға, ауданнан барған кісілерге, қариялар мен зиялы қауым өкілдеріне арнап қонақ асы берілді. Бұл шараны ұйымшылдықпен өткізген аудан азаматтарына ел ризашылығын білдірді.
Созақ ауылындағы кең мейрамханада өткен асқа Өзбек, Қырғыз елдерінен және еліміздің әр облыстарынан азаматтар келіп қатысты.
Еліміздің түкпір-түкпірінен келіп, баба рухына тағзым ете отырып, ортақ дастарханнан дәм тату, елдің ауызбіршілігінің, ынтымағының бауырмалдығының белгісін және біздің бабалар рухын қастерлей білген ұрпақ екенімізді көрсетті.
А.Тілемісов, Сарысу ауданы
