Бауыржан Байбек коронавирустан айығып, жиналыс өткізді. Жиналыс барысында ол “NurOtan” партиясы барлық күшін (партияның 800 мың мүшесі бар) Президент Тоқаев алға қойған міндеттерді орындау үшін жұмылдыратынын айтты. Сондай-ақ Нұрсұлтан Назарбаев туралы пікір білдірді, деп хабарлайды Stan.kz ақпарат агенттігі.
Кездесу барысында Бауыржан Байбек тұңғыш президенттің ел тарихындағы рөліне арнайы тоқталып, әлеуметтік желілерде партия атына айтылып жатқан сындарға да жауап берді.
«Nur Otan партиясы ел бірлігі мен ішкі тұрақтылықты сақтау маңызды екенін үнемі айтып келеді. Партия ту еткен осы мәселелер қаншалықты маңызды екенін өмірдің өзі көрсетіп отыр. Осындай қиын-қыстау кезде партия жұмысынан мін іздеп, «парламент таратылсын, партия таратылсын» деген мағынада әңгіме айтып жүргендер бар. Мұны айтушылар – «Nur Otan» партиясы мемлекеттіліктің, елдіктің негізгі қоғамдық-саяси тірегінің бірі екенін мүлдем түсінбейтіндер», – деді ол.
Оның айтуынша, «Nur Otan» партиясы құрылғалы бері Қазақстан мемлекеттілігін сақтау үшін, қоғам бірлігін бекем ету үшін жұмыс істеп келеді.
Байбек қазір тұңғыш президент туралы да небір пікір айтушылар көбейгенін де айтты. Тарих безбеніне салсақ, кез келген оқиғаның, не тұлғаның өткендегі рөліне бірыңғай оң не болмаса тек қана теріс деп баға беруге болмайды.
«Өткенге баға беру әркімнің қолынан келеді, бірақ ақиқат пен жалғанды ажырату әркімнің өз ар-ұятына байланысты. Ең қиын кезеңде, яғни біз мемлекет боламыз ба, болмаймыз ба деген сонау алмағайып 90-шы жылдары Нұрсұлтан Әбішұлы Назарбаевтың басшылығымен Қазақстан Тәуелсіз мемлекет болып қалыптасты, етек-жеңін жиды», — деді ол.
Ол Елбасы мен сол кездегі аға ұрпақтың 30 жыл бойы мемлекеттіліктің іргесін бекітіп, шекарасын шегендеп, территориясының тұтастығын сақтауға сіңірген ерен еңбегі ұлт тарихында өзінің оң бағасын алары сөзсіз екенін атап өтті.
«Ал, осы жылдары кетеуі кеткен дүниені тезірек түзеуіміз керек. Ол – сөзсіз. Президент жариялаған реформалардың да мәні осы. Бірақ мемлекет басшылығынан кеткен Нұрсұлтан Назарбаевты жата жамандау – елдігімізге, азаматтығымызға сын», – деді ол.
