Байзақ ауданында «AMANAT» партиясының Жамбыл облыстық филиалы жанындағы «Экологиялық мәселелер» жөніндегі аймақтық кеңестің көшпелі отырысы өтті.
Жиында Мемлекет басшысы Қасым-Жомарт Тоқаевтың «Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу» атты Жолдауынан туындайтын міндеттер талқыланды. Кеңес төрағасы Оралхан Дәуіт баяндама жасап, партия бастамасымен жүзеге асып жатқан «Таза Қазақстан» жобасының маңыздылығын атап өтіп, бұл бағыттағы жұмыстарды қоғам болып жалғастыру қажет екенін айтты.
Сонымен қатар, партияның Сайлауалды бағдарламасын іске асыру жөніндегі Жол картасындағы экологиялық көрсеткіштердің Байзақ ауданында орындалу барысы қаралды. Бұл бойынша Қуаныш Бүркітәлиев баяндама жасап, ауданда жалпы аумағы 13 гектарды құрайтын бір ғана полигон бар екенін, оған 42 елді мекеннен тұрмыстық қалдықтар тасымалданатынын жеткізді.
Кеңес барысында полигондардың экологиялық қауіпсіздігін қамтамасыз ету, қалдықтарды қайта өңдеу, жасыл аймақтарды көбейту сынды мәселелер қозғалды.
