Мемлекет басшысының тапсырмасына сәйкес Жамбыл облысы Байзақ ауданына қарасты 40 ауылдық елді мекен 100 пайыз сапалы ауызсумен қамтылды. Бүгін Жаңасаз ауылындағы 150-ден астам отбасыға тіршілік нәрі жетіп, тұрғындардың көптен бергі маңызды мәселесі шешілді.
Ауызсу нысанының ашылу салтанатына аудан әкімі Олжас Баққараев пен жергілікті халық қатысты.
Құрылыс жұмыстарын «GrandStroyCom» ЖШС 2025 жылдың ақпан айында бастап, толық аяқтап отыр. Жоба құны шамамен 487,8 млн теңгені құрады.
– Ауызсу — біздің ауыл үшін ең өзекті қажеттіліктің бірі еді. Бұған дейін құдықтан су ішіп, күнелттік. Осы жағдайға назар аударған Мемлекет басшысына алғысымыз шексіз, — дейді ауыл ақсақалы Жұмахан Жәдіков.
Жамбыл облысында биыл 13,9 млрд теңгеге 24 ауылдық елді мекен мен 9 тұрғын алқапта (Тараз қаласында — 5, Шу қаласында — 4) ауызсу нысандарының құрылысын жүргізу жоспарланған.
Бүгінгі күнге дейін 19 елді мекенде және 5 тұрғын алқапта құрылыс жұмыстары толық аяқталып, тұрғындар сапалы ауызсумен қамтылды. Қамту көрсеткіші қалаларда 99,8 пайызды, ауылдық елді мекендерде 99,6 пайызды құрап отыр.
Қазіргі таңда 3 елді мекен мен 4 тұрғын алқапта құрылыс жұмыстары аяқталып, нысандарды қабылдау-тапсыру рәсімдері жүргізілуде. Ал қалған 2 нысанда құрылыс жұмыстары 90 пайызға орындалды.
