БАЙЗАҚ СПОРТШЫЛАРЫНЫҢ БӘСІ ЖОҒАРЫ

Өткен жұмадан бастап Қырғызстан Республикасының Чолпан-Ата қаласы маңында XXI Халықаралық Ыстықкөл спорт ойындары өтуде. Аталған ойындарда 9 мемлекеттен келген мыңнан астам спортшылар 23 спорт түрлерінен өзара бақ сынауда десек, оның ішінде, біздің Байзақ ауданынан 22 спортшы қатысуда.
Спорт ойындары барысында біздің аудан намысын қорғап жатқан спортшылар жүзу, армрестлинг, гір спорты және кіші футболдан (ересектер және ардагерлер) күш сынасу үстінде.
Ойындардың алғашқы күнінде жүзу спортынан сынға түскен аудан әкімдігі дене шынықтыру және спорт бөлімінің «Бұқаралық спорттық іс-шараларды өткізу орталығы» мекемесі басшысының орынбасары Жұбаныш Қалыбаев пен Сарыкемер ауылдық округі әкімінің орынбасары Еламан Алпысбаев эстафеталық жарыста 50 метр қашықтықта еркін жүзуден қола медальға ие болды. Осы бәсекеде бірінші орын Ресей Федерациясы, екінші орын Өзбекстан Республикасының спортшыларына бұйырды.
Армрестлинг спорт түрінен аса ауыр салмақта өнер көрсеткен, ардагерлер арасында Әлем чемпионы, халықаралық дәрежедегі жаттықтырушы, Абай ауылының тұрғыны Илияс Жансақалов тартысты кездесуде қырғыз спортшысына есе жіберіп алып, үздік үштікті қорытындылады.  Осы салмақта бірінші орынды қырғызстандық, екінші орынды ирандық палуан еншіледі. Ал, 95 келі салмақта күш сынасқан байзақтық Иван Теплухин төртінші орынды қанжығасына байлады.
Гір тасын көтеру спортынан аудан әкімдігі дене шынықтыру және спорт бөлімінің басшысы Ерік Мамадияров 95 келі салмақта екінші орынды иеленіп, күміс медальды тақса, 85 келі салмақта Иван Теплухин қола жүлдеге табан тіреді.
Аталмыш спорт ойындарында кіші футболдан байзақтық екі команда (ересектер және ардагерлер) бақ сынауда. Алғашқы ойында «Ардагерлер» командасы 1:0 есебімен жергілікті қырғыздың «Баткен» командасын ұтса, кезекті кездесуінде «Нарын» командасына 1:6 есебімен есе жіберіп алды.  Бүгінгі шешуші ойында ширек финалға жолдама алу үшін «Озгон» командасымен кездеспек.
Ал, Байзақтың негізгі құрама командасы алғашқы өткізген екі ойында да қарсылас шақ келтірмей, жеңіске жетіп, бүгін «Каэн» командасымен тең ойын көрсетіп, ширек финалға берілетін жолдаманы ұтып алды.