Аудандардың мәдениет күндерін атап өту жобасы 2022 жылы облыс әкімдігінің мәдениет, архивтер және құжаттама басқармасымен жоспарланған болатын. Жобаға қолдау көрсетіп отырған — облыс әкімдігі.
Жоба бастамасы өңіріміздің өркениеті мен мәдениетін көркейту, дамыту мақсатында аудандарда мәдениет күндерін атап өтуден бастау алды.
Жобаны іске асыру бағытында Мәдениет күндерін мерекелеу — ағымдағы жылы Жамбыл облысы Байзақ ауданы Сарыкемер ауылының орталық стадионында өткен “Мәдениет – асыл қазынам!» атты іс-шарадан басталды.
Салтанатты іс-шараның мұқабасын Жамбыл облысы әкімінің орынбасары Үйсімбаев Еркін Құлымбайұлы ашып, жиылған жұртшылыққа өзінің құттықтау алғы сөзін арнады. Сонымен бірге, облыс бойынша халыққа қызмет ететін мәдениет нысандарына тоқталып, өткізілгелі отырған өнер шарасына сəттілік тіледі.
Өз кезегінде аудан әкімі Бақыт Қазанбасов та мәдениет саласында атқарылып жатқан жұмыстар туралы баяндама жасап, ақындар мен спортшылар, батырлар шыққан бай өлкенің табыстарымен бөлісіп, көпшілікті қуаныштарымен құттықтады.
Бұдан соң аудан халқы аудан мәдениетінің қаймақты ұжымы — «Шахан» халық театрының өңірдің шежіресінен сыр қозғайтын «Байтақ ел Байзағым» көрінісін тамашалады.
Қойылым концерттік бағдарламаға ұласты. Концерттің сәнін күміс көмей әншілер мен мың бұралған бишілер келтіріп, көрермендердің көзаймына айналып, жұртшылыққа көтеріңкі көңіл-күй сыйлады.
Атап айтар болсақ, мәдениет саласының үздігі,
бүкілодақтық фестивальдердің жүлдегері Күлила Құрымбаева,
Мэльс Өзбеков атындағы облыстық «Келші, Құланға» әншілер байқауының лауреаты Марал Жанбаева, облыстық, республикалық, халықаралық конкурстардың лауреаты Дулат Жасұзақов, т.б. өз өнерлерін ортаға салды.
Ерекше атап өтейік, 50 жылдан астам өзіндік тарихы бар, аудан өңірінің абыройын әлденеше рет биікке көтеріп, Байзақ мәдениетінің шоқтығы саналған осы — «Шолпан» халықтық ән-би ансамблі мен “Шахан” театры еді.
Іс-шарада сондай-ақ, ауыл шаруашылығы өнімдерінің жәрмеңкесі де ұйымдастырылды.
18 ауыл және ауылдық округтердердің тауар өндірушілері сүт, ет өнімдерімен қатар, көкөністің алуан түрімен жәрмеңке сөрелерін толтырып тастады. Аудан тұрғындары керектілерін қолжетімді бағада тұтынып, өзара риза болысты.
Шара барысында ұлттық спорт ойындары да салтанат құрды.
Жамбы ату, теңге ілу, қазақ күресі, футбол, үлкен теннис, волейбол, тоғызқұмалақ, дойбы, шахматтан жарыс өткізілді. Бұған қоса, қымыз бен шұбат ішу, ет жеуден жарыс ұйымдастырылды.
Осы тұста атап өткен жөн, бес тонналық жүк көлігін сүйреуден — Нұрдəулет Әмзеев 1-орынға иеленіп, мықтылығын көрсетсе, бір қойдың етін жеуден — Сарсенов Алмас, бір шара қымыз ішуден Күдериев Саламаттар да 1-орындарды жеңіп алды.
Сондай-ақ, ашық аспанды ән-жырымен әуелеткен іс-шара ауданның оң саусағынан өнер тамған қолөнер шеберлерінің туындылары мен көнеден сақталып келе жатқан жәдігерлері де қонақтарды тәнті етпей қоймады.
Ақпарымызда ең басты айшықтап көрсетеріміз: атаулы шараға спорттық ойындар, қолөнер шеберлігі, жәрмеңке өнімдерін ұсыну жағынан Байзақ аудандық этностардан — түрік, дүнген, неміс, орыс, кәріс ұлтының өкілдері де көпшілікпен бірге аянбай атсалысты. Елеулі еңбектерімен дараланып, ауданның қоғамдық-мәдени іс-шараларына
бір адамдай ұйымшылдықпен қатысатын белсенділіктерімен де аталған этномәдени бірлестіктер аудандағы тұрақты этносаралық қатынастың және жалпыұлттық бірегейліктің сақталатындығын байқатады.
Мерекелік шараға Тараз қаласынан келген қонақтар мен облыс әкімдігі және мәдениет басқармалары өкілдерінің қатарында “Қоғамдық келісім” КММ басшысы Мүбәрак Қасымқызы да қатысты.
«Мəдениет — асыл қазынам» атты Байзақ ауданының мəдениет күнінің соңы Ескендір Хасанғалиевтің «Атамекен» əнімен қорытындыланды.
Елдігіміздің жарқын көрінісі — туған жер қасиетіне арқа тірей мерекеленетін осынау мәдениет күндері алдағы күндері басқа аудандарда да жалғасын таппақ.
«Ақпараттық жұмыс және қоғаммен байланыс» бөлімі
