1 маусым – Халықаралық балаларды қорғау күні мерекесі қарсаңында балаларға қайырымдылық жасап, игі іс-шаралар ұйымдастырып жатқан этномәдени бірлестіктер қатары аз емес. Бұл күн — әлемнің түкпір-түкпіріндегі балаларға қуаныш сыйлайтын мейрам.
2023жылдың 30 мамырында Жамбыл облысы әкімдігінің денсаулық сақтау басқармасының №7 қалалық емханасында Жамбыл облыстық «Ахыска» Түріктер этномәдени бірлестігінің Аналар кеңесінің ұйымдастыруымен осал топтағы балаларға арналған мерекелік іс-шара өткізілді. Оған аталмыш емханаға тіркелген балалар мен ата-аналары, емхана қызметкерлері қатысты.
Мерекелік шараға шақырылған 15 балаға арнайы сыйлықтар әзірленді. Сыйлықтар жиынтығының іші ойыншықтар мен тәттілерге толтырылған.
Іс-шараның шымылдығын бас дәрігердің ұйымдастыру-әдістемелік жұмысы бойынша орынбасары Исаков Алмас Еркімбекұлы құттықтау сөзімен ашып берді. Аталмыш бірлестіктің Аналар кеңесінің төрайымы Роза Изъятова сыйлықтарды өз қолымен табыстады.
Бұдан соң, мерекелік іс-шараны гүлдендіріп, бүлдіршіндерге көтеріңкі көңіл-күй сыйлау үшін арнайы келген аниматорлар шағын концерттік бағдарлама ұсынды.
Аниматорлармен жарыса билеп, қызықты ойын ойнаған балалардың қуаныштарында шек болмады.
Бала қуанса — әлем қуанытыны анық. Бұл іс-шарада тек балалар ғана емес, ата-аналар да қуанып ұйымдастырушы бірлестікке, барша атсалысқан емхана қызметкерлеріне алғыстарын білдірді.
Ақпараттық жұмыс және қоғаммен байланыс бөлімі
