Балалар арасындағы гепатиттің жаңа түрінің өршуі: инфекция туралы не білеміз және тәуекел аймағында кімдер бар?
Дүниежүзілік денсаулық сақтау ұйымының мәліметтері бойынша, 2022 жылдың 21 сәуірінде Еуропа аймағының 11 және Америка аймағының бір елінен белгісіз шыққан жедел гепатиттің кем дегенде 169 жағдайы тіркелген. Бұл ауруға негізінен 1 айдан 16 жасқа дейінгі балалар бейім келеді.
Сәуір айының басында британдық дәрігерлер Шотландияда 10 жасқа дейінгі балаларда белгісіз шыққан жедел гепатит жағдайларының көбеюін тіркеді. Келесі 10 күн ішінде мұндай диагноздар бүкіл Ұлыбритания аумағында, негізінен 2 жастан 5 жасқа дейінгі балаларға қойыла бастады. Көп ұзамай ұқсас белгілері бар ауру басқа Еуропа елдерінде де тіркеле бастады.
19 сәуірде Ұлыбританияда, Ирландияда, Испанияда, Данияда, Нидерландыда және АҚШ-та балалардағы жедел гепатит жағдайлары туралы хабарлана бастады. Осылайша сырқаттанушылықтың таралу аймағы кеңеюде. Жаңа гепатитті Израиль, АҚШ, Италия, Норвегия, Франция, Румыния және Бельгия дәрігерлері де тіркеді. Науқастардың жас мөлшері де кеңейе түсті: қазіргі уақытта диагноз 1 айдан 16 жасқа дейінгі балаларға қойылуда.
Мамандар атап өткендей: ауру ағымы ауыр, пациенттер көбінесе стационарлық емдеуді қажет етеді, ал кейбір жағдайларда бауыр трансплантациясы қажет болады. Гепатиттен бір өлім жағдайы туралы да белгілі. Ауру көп жағдайда асқазан-ішек симптоматикасы бар және бауыр ферменттерінің 500 ХБ/л-ден жоғары деңгейінің жоғарылауымен ауыр жедел гепатит түрінде жүреді, көптеген жағдайлар сарғаюмен байқалады.
Кейде балаларда іштің ауыруы, диарея және құсу сияқты асқазан-ішек белгілері диагноз қойылғанға дейін бір апта немесе одан да көп уақыт бұрын байқалды. Бұл жағдайда дене қызуының көтерілуі байқалмайды.
Бүгінгі күнге дейін жаңа гепатиттің қайдан пайда болғаны анықталған жоқ. Зертханалық зерттеулер барлық тіркелген жағдайлардан А, В, С, D және Е вирустық гепатиттерін алып тастады.
Ұлыбританияның мамандары қазір бүкіл әлемдегі педиатрлар мен жалпы тәжірибелік дәрігерлерге жедел гепатитке ұқсас белгілері бар науқастарды, сондай-ақ тыныс алу, ішек вирустық және бактериялық инфекцияларды тексеруге және басқа жұқпалы аурулары бар балаларды емдеу кезінде гепатит симптомдарының пайда болуымен байланысты сергектікті күшейтуге кеңес береді.
2022 жылдың 3 айында 2021 жылдың ұқсас кезеңімен салыстырғанда ҚР бойынша жіті вирустық гепатиттің 33,7% — ға, оның ішінде балалар арасында 40,4% — ға өсуі байқалды. Өсім А вирустық гепатиті есебінен байқалды — 1,5 есе. Жамбыл облысы бойынша гепатиттің 3 жағдайы тіркелген, оның 2-уі балалар арасында. Халық арасында вирустық гепатиттің өсуі байқалмады.
Еліміздің аумағына инфекцияның әкеліну қаупінің алдын алу үшін санитарлық-карантиндік пункттерде жоғары бақылауды қоса алғанда, барлық қажетті шаралар кешені қабылдануда.
Әлем елдерінде вирусты гепатитке ұқсас белгілері бар сырқаттанушылықтың тіркелуіне байланысты барлық тұрғындарға эпидемиологиялық сақтықты арттыру қажет екендігін ескертеміз.
Денсаулық сақтау басқармасының
баспасөз қызметі
