Туған ауылының тізгінін ұстау бақыты бұйырған бағы бес елі азаматтардың қатарынан табылғаныма қуанамын. Әрі туған ауылымның аудандағы жалғыз тірек ауылы болғанына марқая мақтанамын. Әр күні жақсы істердің куәсі болып жүргеніме тәубе деймін.
Жалпы Ескі-Шу ауылдық округінің құрамына үш бірдей ауыл, яғни Белбасар, Еңбекші, Тасөткел су қоймасы ауылдары кіреді. Бақытын еңбектен тапқан, сән-салтанаты келіскен ауылымызда өзге ұлт өкілдері де тұрақтап, біте қайнаса күн кешуде. Қайырымдылық іске келгенде ауылымыздың жомарт азаматтары бір кісідей тік тұрады.
Түтіні түзу шыққан ауылымда тындырымды тірліктер де жетерлік. Бірақ біткен іске тоқмейілсу бізге тән емес. Біршама ауылдарды алаңдатқан бірқатар мәселелер біздің ауылда бір жолға қойылған. Газбен жылытудың игілігін көрген аудандағы алғашқы ауылмыз, газ құбыры бірінші біздің ауылға тартылды. Ауыз суға, ағын суға да зәру емеспіз. Ауылдықтар үй іргесіндегі бау-бақшаларын тиімді пайдалануда. Ауылдағы ағайындардың мал басының көбейгендігінен жайылым жерлердің тапшылығы байқалуда. Бұның да шешімі жоқ емес.
Мемлекет тарапынан ауылды көркейтуге бағытталған бағдарламалардың игілігін біз де көріп жатырмыз. Мәселен «Өңірлерді дамыту» бағдарламасы аясында Ш.Уәлиханов атындағы орта мектепке қоршау салынды, «Елді мекендердегі көшелерді жарықтандыру» жобасы бойынша Әзімбай көшесіне жарықтандыру жүргізіліп, дренажды су сорғы орнатылды. Ал, «Жұмыспен қамту жол картасы» бағдарламасы аясында Белбасар ауылының 3 көшесіне, Еңбекші ауылының 2 көшесіне, Тасөткел су қоймасы ауылының 5 көшесіне орташа жөндеу жұмыстары жүргізілді. Тасөткел су қоймасы жағалауында «АТ энерго» ЖШС екінші гидро электр стансасының құрылысын аяқтады. Мұның бәрі «Ауыл — ел бесігі» м емлекеттік бағдарламасының игілігі деп білемін.
Алдағы жылдарға құрған жоспарларымыз ретімен іске асатын болады. Жан жадыратар жақсы іске мұрындық болуға бекініп отырған жайымыз бар. Ордалы елдің отыз жылдығында оңды істерге бет бұрған мемлекетіміздің бесігі саналатын ауылдарда қамал алар қырық жылдыққа дейін қыруар тірлік атқарылады деп бек сенемін!
Бақытжан ДЖАМАНҒАРАЕВ,
Ескі-Шу ауылдық округінің әкімі.
