ҚР Үкіметінің 2019 жылғы 22 мамырдағы №303 қаулысымен елімізде 10 қазан — Қазақстан кәсіподақтары күні ретінде атап өтіледі. Мерекенің аталып өтуі азаматтық қоғамдағы кәсіподақтардың рөлін нығайту мен дамытуға, ал кәсіподақтың өзі қызметкерлердің құқықтарын қорғауға және олардың
әлеуметтік-экономикалық жағдайын жақсартуға бағытталған.
Осыған орай ағымдағы аптаның бейсенбісінде Шу аудандық орталық ауруханасында салтанатты жиын өтті. Мерекелік кездесуге аудандық орталық аурухананың бас дәрігері Жайдар Әйтішев, аудандық орталық аурухананың бастауыш кәсіподақ ұйымының төрайымы Назым Имашева, кәсіподақ ұйымының мүшелері, сондай-ақ медицина саласының ардагерлері қатысты.
Жалпы, кәсіподақ өзінің басты міндеті — еңбек азаматтарының заңды құқықтары мен мүдделерін қорғауды лайықты жүзеге асырып, жалақыны арттыруда белсенді әрекет етіп, әлеуметтік әріптестікті дамыту мен нығайтуға атсалысып, қызметкерлердің өмір сүру деңгейін жақсартуға, жұмыс орнының сақталуына көп күш жұмсайды. Еңбек және денсаулық сақтау саласындағы заңнамалардың орындалуын бақылауға алып, қызметкерлердің және олардың отбасы мүшелерінің демалысын ұйымдастырып, әрі сауықтыруға бағытталған жүйелі жұмыстарды жүргізеді. Сол себепті де кәсіподақтың кез келген мекемедегі, ұжымдағы орны айрықша.
Салтанатты басқосу барысында сөз алған Жайдар Әйтішев ізгі тілегін жеткізе отырып, қоғамда кәсіподақтардың маңызды рөл атқаратынын атап өтті. Сонымен қатар өз ісінің кәсіби маманы, аудандық орталық аурухана кәсіподағының төрайымы Назым Имашеваға алғыс айтты. Назым Қуанышбайқызы да қалыс қалмай, әріптестерін айтулы мерекемен құттықтап, дендеріне саулық, отбасыларына амандық тіледі.
Құттықтау сөздерден кейін марапаттау рәсімі басталып, медицина саласының алғы шепінде жүрген қызметкерлер мен сала ардагерлеріне естелік сыйлықтар табысталды. Сондай-ақ, “Senim” денсаулық сақтау жүйесі жұмыскерлерінің салалық кәсіптік одағы Жамбыл облыстық филиалының, аудандық орталық аурухананың бас дәрігерінің, бастауыш кәсіподақ ұйымы төрайымының Құрмет грамотасы мен Алғыс хаттары табыс етілді.
Мұнан бөлек, сала қызметкерлерін құрметті еңбек демалысына шығарып салу салтанаты да өтті. Мерекелік шараға қатысушылар аудандық орталық аурухана басшылығына алғыстарын білдіріп, алдағы қызметіне табыс тіледі. Салтанатты жиын соңында шараға қатысушылар жиналып, естелік суретке түсті.
