«Бейбітшілік пен келісім» жобасы – аймақтағы этносаралық келісімді нығайтуға және халықты толғандыратын мәселелерді анықтауға бағытталған.
Пилоттық жобаның алғашқы жұмысы Шу ауданынан бастау алды. Аталмыш бастама аясында күні кеше «Этносаралық және конфессияаралық келісім» тобының мүшелері аудан тұрғындарымен кездесті.
Айта кетейік, топ құрамында облыстық ақпарат және қоғамдық даму басқармасы басшысының орынбасары Қуаныш Мамашев, «Қоғамдық келісім» КММ басшысы Мубарак Жинақбаева, Жамбыл облысының қорғаныс істері жөніндегі департаменті Әскерден тыс жұмыс және келісімшарт бойынша әскери қызметке қабылдау тобының бастығы, лейтенант Ербол Бекмаханов және Шу ауданы әкімінің орынбасары Найман Сұлтанбаев бар.
Жұмыс тобы аудандағы Ескі-Шу, Жаңа жол, Қонаев, Төле би, Ақтөбе ауылдық округі мен Қорағаты ауылдық округіне қарасты Еңбек, Жиембет, Мойынқұм ауылдарына барып, тұрғындар тілегіне құлақ асты.
Сондай-ақ, кездесу барысында тұрғындарға Қазақстан халқы Ассамблеясының «Бірлік пен келісім жолындағы 30 жыл» атты XXXIV сессиясының шешімдерін іске асыру төңірегінде бірқатар мәселелер айтылды.
