Жамбыл жерінде руханият пен қалам иелерінің басын қосқан тағылымды шара өтті.Ш.Мұртаза атындағы Руханият және тарихтану орталығының ұйымдастыруымен белгілі журналист, жазушы, бауыржантанушы Бекет Момынқұловтың 70 жас мерейтойына арналған «Бекет салған сара жол» атты әдеби кездесу жоғары деңгейде ұйымдастырылды.![]()
Кеш барысында қоғам мен қаламгерлік ортада абыройлы азаматтар мерейтой иесінің өмір жолы мен шығармашылығы туралы жүрекжарды лебіздерін білдіріп, естеліктерімен бөлісті. Олардың қатарында ардагер журналист Асқарбек Сейілхан, медицина ғылымдарының докторы, Қазақстан Журналистер одағының мүшесі Сағындық Ордабек болды. Сонымен қатар ақын, журналист Нұржан Қадірәлі арнау өлеңін оқып, әдеби кештің сәнін кіргізді.![]()
Мерекелік басқосуға Жамбыл облысы әкімінің орынбасары Серік Сәлемов арнайы келіп, облыс әкімінің құттықтау хатын табыстап, мерейтой иесінің иығына шапан жапты. Сондай-ақ облыстық мәдениет және тілдерді дамыту басқармасының басшысы Ерлан Жүнісбай да шараға қатысып, жылы лебізін білдірді.![]()
Кешке Қазақстан Жазушылар одағы мен Журналистер одағының Жамбыл облыстық филиалдары, облыстық және қалалық ардагерлер кеңестері, мәдениет басқармасы мен аудан делегациялары, Жамбыл телеарнасы, Aulieata Media ұжымы, «Знамя труда» газетінің редакциясы және қаламгердің шәкірттері де қатысып, жүрекжарды тілектерін білдірді, әсерлі естеліктерін ортаға салды.![]()
Әдеби кеш аясында Бекет Момынқұловтың жаңа еңбегі — «Момышұлы әлемі» атты кітабының тұсаукесері өтті. Елдік пен ерлік, тәрбие мен тағылым туралы терең толғамдарға толы бұл шығарма зиялы қауым назарына ұсынылып, жоғары бағасын алды. Жаңа кітапты салтанатты түрде облыстың беделді тұлғалары — Серік Сәлемов, Жаңабай Миллионов және Хамит Есаман таныстырды.
«Бекет салған сара жол» — жазушыға деген құрметтің, ұлттық руханиятқа деген жанашырлықтың айғағы болды.
