Білім – қоғамның ең басты құндылықтарының бірі. Жамбыл облысында білім беру сапасын арттыру мен оны жетілдіру бағытында ауқымды жұмыстар атқарылуда. Өңірдегі мектептерді интернетпен қамту, білім мекемелерінің материалдық техникалық базасын нығайту және мұғалімдерді қолдау шаралары жүйелі түрде жүзеге асуда.
Қазіргі заманғы білім беру жүйесі жоғары жылдамдықты интернетсіз мүмкін емес. Жамбыл облысындағы барлық мемлекеттік мектептер интернет желісіне қосылған. 2024 жылы интернет жылдамдығы 20 мегабит/сек болатын мектептердің үлесі 63%-дан 97,4%-ға дейін өсті. 2025 жылы бұл көрсеткішті 100%-ға жеткізу ьбағытындағы жұмыстар жолға қойылған. Бұл білім сапасын арттыруға оң ықпал етеді, өйткені оқушылар мен мұғалімдер онлайн ресурстарды еркін пайдалана алады. Сонымен қатар, республикада қолға алынған Старлинк жобасына Жамбыл облысының 53 мектебі енді. Бұл шалғайдағы ауылдық мектептердің де интернетке тұрақты қосылуын қамтамасыз етеді.
Балаларды жалпыға міндетті біліммен қамту – өңірдегі басты басымдықтардың бірі. 2024 жылы көпбалалы және аз қамтылған отбасылардың балалары үшін ыстық тамақ, киім-кешек және жазғы сауықтыру шараларына 5,6 млрд теңге бөлінді. Сонымен қатар, 2023 жылдың қыркүйегінен бастап барлық 1-4 сынып оқушылары бір мезгіл тегін ыстық тамақпен қамтамасыз етілуде. Бұл шаралар оқушылардың денсаулығын нығайтып, оқу үлгеріміне оң әсерін тигізеді. 2025 жылы оқушыларды тамақтандыруға 10,1 млрд теңге қарастырылған. Оның ішінде жекелеген санаттағы 39 876 оқушыға – 3,5 млрд теңге, ал 1-4 сыныптағы 73 703 оқушыға – 6,6 млрд теңге бөлінді.
Білім сапасын арттырудың маңызды шарттарының бірі – мектептердің материалдық техникалық базасын нығайтып, жаңа модификациялық кабинеттермен қамтамасыз ету. 2024 жылы өңірімізде 10 білім нысанына күрделі жөндеу жүргізіліп, 3 «Жайлы мектеп» ашылды. Жалпы, 14 жаңа білім беру нысаны оқушылар игілігіне берілді. Бұл жұмыстар орын тапшылығы, үш ауысымды және апатты мектептер мәселесін шешуге мүмкіндік берді.
Ал, 2025 жылы 21 білім нысанының құрылыс пайдалануға берілетін болады. 10 мектепке күрделі жөндеу жұмыстары жасалмақ. Сондай-ақ, Мемлекет басшысының үш жыл ішінде еліміздегі 1300 мектепті қайта жаңартуды жүргізу тапсырмасына сәйкес 2025-2027 жылдары өңірде 66 мектеп жаңартылады. 2024 жылы өңір мектептері үшін 285 жаңа үлгідегі пәндік химия, физика, биология кабинеттері, 22 STEM зертханасы, 21 робототехника кабинеті, 53 ұлдарға және 52 қыздарға арналған шеберханалар сатып алынды. Бұл оқушылардың тәжірибелік дағдыларын дамытуға мүмкіндік береді. Білім беру жүйесін жаңғырту аясында 2025 жылы да осы бағыттағы жұмыстар жалғасатын болады.
Балаларды сапалы біліммен қамту барысында олардың қауіпсіздігі де басты назарда. Облыстағы барлық білім беру ұйымдары бейнебақылаумен, дабыл түймесі жүйелерімен 100% жабдықталған. 456 мектеп жедел басқару орталықтарына, 245 мектеп турникеттермен/домофондармен және 240 мектеп мамандандырылған күзетпен қамтамасыз етілген. 2024 жылдың 1 шілдесінен бастап Тараз қаласында балабақшаға жолдама беру бойынша пилоттық жоба аясында «INDIGO: Электрондық балабақша» жаңа ақпараттық платформасы жұмысын бастаған болатын. Бүгінгі күні облыстың барлық аудандарындағы мектепке дейінгі ұйымдар аталған платформамен жұмыс жүргізуде. Сонымен қатар білім беру процесін жаңа деңгейге көтеру мақсатында фейс-бақылау жүйесі енгізілуде. Бұл жүйе «Qamqor Technologies» мобильді қосымшасы арқылы жүзеге асырылады. Қазіргі таңда жүйенің тиімділігін арттыру үшін «Delta com service» компаниясы тарапынан жұмыстар жүргізілуде. Балалардың қауіпсіз әрі жайлы ортада білім мен тәрбие алуы – ең маңызды міндетіміз.
Жамбыл облысында 26 мыңнан астам педагог қызмет етеді. Қазіргі таңда сапалы білім беруді қамтамасыз етудің негізгі факторы – педагогтердің кәсіби шеберлігі мен олардың әлеуметтік жағдайын жақсарту. Осыған байланысты мемлекет мұғалімдерді қолдау шараларын күшейтіп, олардың жалақысын өсіру, кәсіби біліктілігін арттыру және әлеуметтік кепілдіктерін қамтамасыз ету бағытында жүйелі жұмыстар атқаруда. Педагог мамандығының беделін көтеру мақсатында 2020 жылдан бастап мұғалімдердің жалақысы екі есеге артты. Бұған қоса, біліктілік санаты бар ұстаздар лауазымдық жалақысының 35%-дан 50%-ға дейінгі мөлшерінде үстемеақы алады. Бұл өзгерістер мұғалімдерді кәсіби дамуға ынталандырып, білім сапасына оң әсерін тигізеді. Өңірлердегі білім сапасын теңестіру және білікті мамандарды ауылдық жерлерге тарту мақсатында ауыл мектептерінде жұмыс істейтін педагогтерге арнайы жеңілдіктер қарастырылған. Олардың еңбекақысы қалалық әріптестерімен салыстырғанда кемінде 25%-ға жоғары. Бұл шара шалғай елді мекендердегі білім сапасын арттырып, ауылдық мектептерде тәжірибелі мамандардың тұрақты қызмет етуіне ықпал етеді.
Мұғалімдердің кәсіби құзыреттілігін дамыту мақсатында тұрақты түрде біліктілікті арттыру курстары ұйымдастырылуда. Мұндай курстар заманауи оқыту әдістерін меңгеруге, цифрлық технологияларды пайдалануға және пәндік білімдерін тереңдетуге көмектеседі. Жамбыл облысында педагогтерді қолдауға бағытталған бұл кешенді шаралар ұстаздардың әлеуметтік жағдайын жақсартып қана қоймай, білім беру сапасын жаңа деңгейге көтеруге ықпал етеді. Мұғалімдердің еңбегін лайықты бағалау – өскелең ұрпақтың сапалы білім алуына жасалған маңызды қадам.
Жамбыл облысында білім беру жүйесін дамыту бойынша кешенді жұмыстар жүргізілуде. Интернет жылдамдығын арттыру, әлеуметтік қолдау шараларын кеңейту, мектептердің материалдық-техникалық базасын нығайту және мұғалімдерді қолдау – осының барлығы өңірдегі білім сапасын жақсартуға бағытталған. Бұл бастамалар білім алушылар үшін қолайлы жағдай жасап, болашақ ұрпақтың сапалы білім алуына мүмкіндік береді.
