Ауылымызға арнайылап ат басын бұратындардың да, жол-жөнекей жолаушылардың да еріксіз көзіне
ұратыны — сәулеті келіскен еңселі ескерткіш. Иә, ат тізгінін тарта ұстаған ақ сауытты Ақша батырдың
келісті ескерткіші. Кейде ойлаймын, даңқы асқан ауылымыздың берекелі істерінің бастауы әруақты ердің қолдауынан болар деп… Ақша батыр ерлігі өз алдына бір төбе әңгіме.
Ал, өткенге көз жүгіртсек, абыройдың биігінен көрінген ауылымыздың алғашқы құрылу тарихында Хати
Сауранбаевтың еңбегі ерек. Қатардағы колхозшы бола жүріп, үш жыл егіс бригадасын басқарған Хати Сауранбаев 1933 жылы ауыл өз алдына шаңырақ көтергенде төраға болып сайланады. Туған колхозына ширек ғасыр бойы басшылық жасайды. Беткеұстар азамат басшылық еткен тұста “Белбасар” ауылы аудан мен облыстағы алдыңғы қатарлы шаруашылықтардың бірі атанады. Республиканың ауыспалы қызыл туын жеңіп алып, Алтын кітапқа да жазылды. Ұлы Отан соғысы кезінде жоғары өнім өндіріп, майданды азық-түлік, киім-кешекпен қамтамасыз етуге қосқан еселі үлесі үшін Кеңес одағы Қорғаныс комитетінің Алғыс хатына ие болып, Кеңес одағының энциклопедиясына енеді.
Сол тұста ауылдың еңбек адамдары жүктелген міндеттемені межесінен асыра орындап, рекордтық
көрсеткішке жетті. Еңбек озаттары Кеңес одағының ордендерімен және медальдарымен марапаттал-
ды. Сол кездері “атышулы бесеу” атанған-колхоз төрағасы Хати Сауранбаев, бригадир Әбілмәжін
Сатыбалдиев, звено жетекшілері Күләй Тұңғатарова, Жезбала Шоманова, Жәмилә Мамедовалар
КСРО Жоғарғы Кеңесі Президиумының Жарлығымен Социалистік Еңбек Ері атағын алды. Аты дардай
атақ алғандардың артын іле-шала белбасарлық екі шопан Есіркеп Бекқожаев, Әзімбай Шәлібековтер
де егіздетіп төл өргізіп, онысын семізді етіп, ірі табысқа жетіп, кеудесіне Социалистік Еңбек Ері
төсбелгісін тақты. Бұл күнде “ауылымыздан жеті бірдей Социалистік Еңбек Ері шыққан” деп кеудемізді
кере мақтанамыз.
Өресі биік, өрісі кең, өсіп-өнген ауылымызда ұрпақтар сабақтастығы жарасым тапқаны қуантады. “Ата-
дан ұл туса игі, ата жолын қуса игі” демекші атасы құрған ауылды көркейтуге атсалысудан тартынбаған
текті азамат Болат Сауранбаевтың ісі көпке үлгі. Осындай жолы оң, жомарт жүректі жерлесімізге қарап,
жастарымыз бой түзеп келеді. Бірлігі бекем, тірлігі көркем ауылымызда ауыз толтырып айтарлық істердің жібі үзілмейтініне бек сенемін!
Дәулетқұл ТӨЛЕКОВ,
Ескі-Шу ауылдық округі ақсақалдар алқасының төрағасы.
