Қарағанды облысындағы Нұра ауданының сегіз ауылында жол жөнделіп, су құбыры желілері салынады, – деп хабарлады turkystan.kz.
Нұра ауданында «Ауыл – Ел бесігі» жобасы аясында 2023 жылы Егінді, Байтуған, Ахмет, Көбетей, Заречное, Тассуат, Мыңбаев және Алғабас ауылдарының орамішілік жолдарына орташа жөндеу жұмыстары жүргізіледі. Сондай-ақ екі ауылда су құбыры желілерін салу жоспарға енгізілген.
«Мемлекет басшысының халықты сапалы ауызсумен жүз пайыз қамтамасыз ету жөніндегі тапсырмасын орындаймыз. 2022 жылы орталықтандырылған сумен жабдықтауға қол жеткізу 94,6%-ды құрады. 2025 жылға дейін 98%-ға жеткізу жоспарланып отыр. Биыл Жараспай және Құланөтпес ауылдарында су құбыры желілері салынады. Сонымен қатар Ізенді ауылында су құбыры желілерін салу мәселесі шешіледі», – деді Нұра ауданының әкімі Бақытжан Мұқанов.
Ол ауданда тұрғын үй құрылысы, әлеуметтік инфрақұрылымды дамыту және елді мекендерді абаттандыру жалғасатынын атап өтті.
«Ауыл – Ел бесігі» жобасы бойынша Байтуған және Заречное ауылдарында фельдшерлік-акушерлік пункттердің құрылысы жүріп жатыр. Құрылыс-монтаж жұмыстарын биыл аяқтау жоспарда бар.
