НҰР-СҰЛТАН. ҚазАқпарат – Қарағанды облысы Ұлытау ауданы аумағындағы Болған ана кесенесінде археологиялық зерттеу 2018 жылы басталды. Қазба жұмыстары нәтижесінде Болған ананың бейнесі жасалып, бірқатар құнды жәдігерлер табылды. Осы орайда ҚазАқпарат тілшісі тарихи тұлғаның бейнесін жасаған мүсінші Айдос Есмағамбетовпен тілдескен еді. ҰҚСАС ЖАҢАЛЫҚТАР Болған ана Жошы ханның қызы ма, келіні ме: Жапония мен Ұлыбритания зерттеді Ұлттық музейге Болған ананың жаңғыртылған бейнесі қойылды Салт-дәстүрді жастарға заман талабына сай жеткізу қажет –«Рухани жаңғыру» орталығының басшысы «Әлемдік деңгейдегі мадам Тюссо музейінің тәжірибесін алсақ, олар әрдайым және әртүрлі гиперреалистік бейне жасайды. Мысалы, билік басына жаңа президент келсе, міндетті түрде оның мүсіні жасалады. Оның қатарында тарихи тұлғалар да бар. Болған ананың мүсініне келсек, алдымен археологтар оның бейнесін жасап берді. Мүсін шынайы болуы үшін тұлғаға қатысты әр дерек өте маңызды. Яғни мұрны, көзі мен бет-жүзінің пішіні — бәрі маңызды. Тұлғаға қатысты математикалық деректер белгілі болған соң, одан әрі іске мүсінші кіріседі. Болған ана туралы жиналған бар мәліметтерге сүйене отырып, оның бейнесін айнытпай жасауға тырыстым. Алдымен бет-бейнесі, содан соң қасы, шашы жапсырылады», — деді Айдос Есмағамбетов. Айтуынша, бұрын мүсіншінің әйел бейнесін жасау тәжірибесі болмаған. Алғаш рет өткен жылы танымал әнші Роза Бағланованың мүсінін жасаған. «Бұл — менің алғаш ғылыми жұмысым. Ал ғылымда қателік жіберуге болмайды. Ғылымда антропологиялық өлшем деген түсінік бар. Әрине, жұмыс барысында археолог мамандармен үнемі байланыста болдым. Мүсіннің әр нүктесін аяқтаған соң археологтарға көрсетіп отырдым. Өзімізге жақын моңғолоид және азиат мимикасын да қостым. Мүсін өнерінде біреуден көшіру немесе өз ойынан шығару деген болмайды, оның үстіне тарихи тұлға», — дейді мүсінші. Айта кетейік, бүгін елордадағы ҚР Ұлттық музейінде Болған ананың мүсіні көрмеге қойылды. Сондай-ақ, көпшілік назарына мүсіннен басқа бірқатар құнды жәдігерлер ұсынылды. Одан бөлек, отандық археолог Айбар Қасеналин Болған ана Жошы ханның қызы ма, келіні ме деген сауалға қатысты пікір білдіріп, генетикалық талдау жасалғанын айтқан еді.
Барлық құқықтар қорғалған. inform.kz белсенді сілтемені пайдаланыңыз https://www.inform.kz/kz/bolgan-ananyn-musini-kalay-zhasaldy_a3898423
