Көпті елжіреткен суретті алматылық журналист Анатолий Иванов-Вайскопф Facebook парақшасында жүктеп, фотоны өзі түсіргенін айтқан. Мұны көрген желі қолданушылары авторға ризашылығын білдіріп, суреттің мәні тереңде жатқанын жазды.
«Терең мағыналы фото. Анатолий, сізге рахмет», «Тарихи сурет. Меніңше, музейге қоюға тұрарлық», «Бұл кадрда оқиға сөзсіз суреттелген», «Трагедия мен дүрбелең бір ғана фотомен жеткізілген», «Мықты!» деп жазды желі қолданушылары.
Пікір жазғандардың көбі ел туын атыс-шабыс кезінде көк түтін арасынан алып шығып жатқан ер адамның отаншылдығына тәнті болды. Желідегілердің арасында оны қаза тапты дегендер де бар. Мәселен, Айбек Албан есімді Facebook қолданушысы суреттегі жігіттің қақтығыс кезінде оқ тиіп, мерт болғанын жазды. Бірақ бұл ақпараттың қаншалықты рас екені белгісіз.
