Павлодарда дәрігерлер сегізінші қабаттан құлаған баланың өмірі үшін күресіп жатыр. Екі жасар сәби ауыр жарақат алған деп хабарлады turkystan.kz Pavlodarnews.kz-ке сілтеме жасап.
Павлодар облыстық балалар ауруханасы директорының медицина бөлімі жөніндегі орынбасары Ирина Орсагоштың айтуынша, 6 қыркүйек күні сағат 11:27-де өңірлік балалар ауруханасына жедел жәрдем машинасымен сегізінші қабаттан құлап, зардап шеккен бала жеткізілді.
«Бала өте ауыр жағдайда жансақтау бөліміне түсті. Дереу шокқа қарсы реанимациялық іс-шаралар басталды. Алған жарақаттары өте ауыр. Бас сүйегі зақымданып, баланың қан тамырлары мен өкпесі жыртылған», – деді Ирина Орсагош.
Дәрігерлер оның ішкі қан кетуін тоқтатқан. Бала қазір өмір мен өлімнің арасында арпалысып жатыр.
Естеріңізге сала кетейік, қайғылы оқиға М.Жүсіп көшесі, 270-үйде болған. Екі жасар сәби көпқабатты үйдің сегізінші қабатынан құлады деген қоңырау 6 қыркүйек сағат 11:17-де түсті. Оқиға орнына жедел жәрдем қызметі 4 минутта жетті.
Оған жедел медициналық көмек көрсетілген. Жағдайын ауыр деп бағалаған дәрігерлер сәбиді бірден облыстық балалар ауруханасына жеткізді.