Бірлік ауылдық кітапхана қызметкерлерінің ұйымдастыруымен Елбасымыздың «Болашаққа бағдар: рухани жаңғыру» атты мақаласынан туындайтын «Дәстүр мен ғұрып» арнайы жобасы және Адалдық алаңының «Парасат жолы» жобасы аясында «Дәстүрлі қазақ елі» атты әдеби – музыкалық композиция кеші өтті. Оған Бірлік ауылдық округінің жастар ісі жөніндегі инспекторы А.Аралбек, мәдениет қызметкерлері және ауыл тұрғындары қатысты. Мерекелік шарада осы жолдардың авторы қазақтың салт-дәстүрлеріне, әдет — ғұрпына кеңінен тоқталып, дәсүрімізді барынша дәріптеді. Сондай-ақ М.Х Дулати атындағы орта мектеп оқушылары әрі кітапхананың тұрақты оқырмандары М.Арсен, А.Амангелді дәстүрмен өрілген өлең жолдарын оқыды.
Ұлттық құндылықтарымызды ұрпақ бойына сіңіруге бағытталған берері мол кеште қазақ халқының салт-дәстүрінің бірі- «Тұсаукесер» рәсімінен үзінді көрсетілді. Енді ғана тәй-тәй басып, қаз-қаз тұрған бөбектің тұсауын кесіп, ырымы жасалғаннан кейін кеш қонақтары ізгі тілектерін жаудырды. Әсерлі кеш соңында кітапхана оқырманы Л.Сагиндыкова «Ағайынға арнау» әнін шырқап, кешті қортындылады.
Жаңыл ҮРКЕРБАЙ,
Бірлік ауылдық кітапханасының кітапханашысы
