Қазақстандық мәнерлеп сырғанаушы Денис Теннің жанкүйерлері Алматы қаласындағы «Халық Арена» кешенін спортшының есімімен атауды ұсынуда. Осылайша олар мәнерлеп сырғанау спортының теңдессіз таланты атанған Тенге құрмет көрсетпек.
«Біз Денис Теннің жанкүйерлері, достары, оны жақсы көретін жандар Алматы әкімдігінен «Халық Арена» мұзайдынының атауын тәуелсіз Қазақстан тарихында Олимпиада ойындарының (2014), әлем чемпионаттарының (2013, 2015), төрт құрлық чемпионатының (2015), қысқы Универсиада, қысқы Азия ойындарының медальдарына (2017) ие болған бірінші және жалғыз қазақстандық мәнерлеп сырғанаушы, ИСУ турнирінің медалін жеңіп алған, Қазақстан Республикасының еңбек сіңірген спорт шебері, алматылық Денис Теннің атына ауыстыру мәселесін қайта қарауды сұраймыз. Денис Тен қазақстандық мәнерлеп сырғанаудың беткеұстары болды. Еліміздегі спорттың бұл түрінің негізін қалаушы және Қазақстанның халықаралық спорт имиджінің нығаюына өзіндік үлесін қосты.
Ел азаматтары қазасы әлемді қайғыртқан көрнекті мәнерлеп сырғанаушының есімін мұзайдынға беруді жөн санаймыз және оның есімін осылай ардақтағымыз келеді», – делінген сұраныс петицияда.
Естеріңізде болса, өткен жылдың 19 шілдесінде Денис Тен пышақ жарақатынан көз жұмған болатын. Осылайша өмірден ерте озған дара таланттың есімін ардақтап, жанкүйерлер құрмет көрсетуде. Әрине, соңғы шешім әкімдік қарауына қалатыны анық. Десе де Ер есімі әрдайым ел есінде екені айқын.
С. ТІЛЕУЖАН
