М.Х.Дулати атындағы Тараз өңірлік университетінің бас ғимаратының Тұңғыш президент залында жоғары оқу орындары арасындағы іскерлік байланысты арттыру мақсатында Satbayev University-нің арнайы делегациясы бас қосты,-деп хабарлайды «Шаңырақ» ақпарат агенттігі.
Satbayev University-нің Басқарма төрағасы-ректоры Мейрам Мұхаметрахымұлы Бегентаев бастаған делегация мүшелері, басқарма мүшесі, ғылым және халықаралық ынтымақтастық жөніндегі проректор Әлібек Жұмабекұлы Шоқпаров, Қаратай Тұрысов атындағы геология және мұнай-газ ісі жөніндегі институттың директоры Асқар Хамзаұлы Сыздықов, басқарманың аппарат басшысы Сапар Қатаұлы Шалабаев Дулати университетінің ғылыми кеңесімен кездесті.
Кездесу барысында болашақтағы бірлескен ғылыми жұмыстар мен оқу бағдарламаларын жүзеге асырудағы ынқтымақтастықты арттыру мәселелері сөз болды. Соңында университетаралық байланысты нығайту, ғылымды дамыту мақсатында екіжақты меморандумға қол қойылды.
Екіжақты келісім туралы құжатта кадрлардың біліктілігін және қайта даярлау деңгейін арттыру бағдарламаларын, қосдипломды білім беруді ұйымдастыру және бірлескен білім беру бағдарламаларын әзірлеу, университеттердің технологиялары мен зерттеулерінің нәтижелерін ілгерілету, оларды жамбыл өңірінде жүзеге асыру және басқа да тәсілдер арқылы бакалаврларды, магистрлерді және PhD докторларын даярлау деңгейін көтеруге қолайлы жағдай жасауды көздейді.
Құралай СЕЙСЕНБЕКҚЫЗЫ
