Мәжіліс депутаты Ерлан Саиров ел ішінде болған жаппай тәртіпсіздікке қатысты пікір білдірді
Оның айтуынша, еліміздегі кедейлік мәселесін шешпей, саяси тұрақтылық болмайды. Сондай-ақ бұзақылық жасаған азаматтардың көпшілігі біздің қандастар мен жас балалар.
«Еліміздің халқының 1,5 млн-ға жуығы кедейлер.
Еліміздегі кедейлік мәселесін терең, жан-жақты шешпей, саяси тұрақтылықтың ауылы алыс болары сөзсіз. Кеше көшеге шыққан, бұзақылық жасаған азаматтардың көпшілігі біздің қандастар, көпшілігі жас балалар. Олардың бұл жүріс-тұрысы үшін барлығымыздың (менің де) кінәміз бар. Өйткені, ол жастардың мүлдем «өмір перспективасы» жоқ. Олардың жоғалтатын ештеңесі жоқ. Проблема осында. Бұл – ең бірінші мемлекеттік саясаттың бұрыстығы. Біз ауылды ұмытып кеттік, ауыл мен қаланың арасындағы мәдениет, білім, қаржы деңгейіндегі теңсіздіктің нәтижесінде олар қалаға келеді. Қалада ол жастарды күтіп отырған ешкім жоқ. Еріксіз базар, сауда орталықтарына барады. Ол жақта тәшкі тасып, жүк тасушы болып еңбек етеді. Жалақысы өте аз, әлеуметтік гарантия жоқ, кредиттен кредит. Әке-шешелерінің де әлеуметтік жағдайы төмен. Сол жастар қаланың белгілі бір топтарының тоқ, уайым жоқ өмірін көреді. Іште ыза, ымырасыздық, кек, төзімсіздік пайда болады. Дәл осы кезде олардың жолында діни экстремистер пайда болып, идеологиялық жұмыс істейді. Өкінішке орай, мемлекет, қоғам, біз – осы тәртіпсіздікті өзіміз жасадық. Ауыл мектептерінің білім деңгейін көтеріп, ауылдарда балаларымызды техника, ноу-хау, жаңа біліктілікке баулымасақ, бұл құбылыстан құтылу мүмкін емес» делінген Мәжіліс депутатының Facebook-тегі парақшасында.
Сонымен қатар, депутат ауылдардың аурухана, кітапхана, интернетке қолжетімділік мәселесін шешу керектігін айтты.
«Ауылдарда жол мүлдемге жоқ. Ауылдарға барғанда «жол азабының» не екендігін сезінерің анық. Қалаға келген, базарларда еңбек етіп жүрген біздің жастарымызды бизнеске баулу, оларға өмір перспективасын беру бағдарламасын жасау өте маңызды!» дейді ол.
