Атырауда өгей қызына азғындық әрекет жасаған өгей әкеге қатысты сот үкімі шықты.
Үйде ешкім жоқ кезде, қызға зорлық көрсетіп, айтуға ауыз бармайтын азғындық әрекет істеген әке 15 жылын темір тордың ар жағында өткізеді, деп хабарлайды Шаңырақ инфо Экспресс К.сайтына сілтеме жасайды.
Атыраулық әйелмен көңіл қосқан алматылық азамат өзінің өгей қызын жеті жылдан астам уақыт зорлап келген. Ол жымысқы әрекетін үйінде, әйелі жоқ кезде іске асырып отырған. Ал, жәбірленуші қыз бала өгей әкенің қаһарынан қорқып, ешкімге тіс жармапты. Әйел күйеуінің ісін тек ажырасқаннан кейін ғана біледі.
«Сотталушы кәмелетке толмаған қыздың жеке басын қорлап, жыныстық әрекетке мәжбүрлеп аса ауыр қылмыс жасаған. Бір отбасында тұрып, өгей қызына психологиялық қысым көрсетіп, өзінің жыныстық қажеттіліктерін қанағаттандырған. Күш қолданып басқа да сексуалдық әрекеттер жасаған», — деп хабарлады Атырау облысының қылмыстық істер жөніндегі мамандандырылған ауданаралық сотында.
Өгей әкенің кінәсі куәгерлер мен жәбірленушінің айғақтарымен, сараптама қорытындыларымен және бейнежазбалармен, «WhatsApp» қосымшасындағы әңгімелермен толық дәлелденді.
Сотта прокурор педофилге 20 жыл бас бостандығынан айыру жазасын тағайындауды сұрады. Ал өзі болса кінәсін мойындамады.
— Айыптау актісінде жазаны ауырлататын мән-жайлар көрсетілмеген. Егер тергеуші мен прокурор актіде жазаны ауырлататын мән-жайларды көрсетпесе, онда сот оларды өз бастамасы бойынша анықтауға құқығы жоқ. Іс бойынша жазаны жеңілдететін мән-жайлар анықталды, — деп түсіндірлі үкімді сотта.
Сот үкімімен өгей әкеге өмір бойына педагогикалық және кәмелетке толмағандармен жұмыс істеуге байланысты лауазымдарды атқару құқығынан айыра отырып, 15 жыл мерзімге бас бостандығынан айыру жазасы тағайындады.
ЭК тілшісі зардап шеккен қыздың анасымен сөйлесіп, оның сот үкімімен келіспейтінін білді.
«Сот үкіміне риза емеспін. Темір тордың ар жағында ең кем дегенде 20 жыл, тіпті өмір бойына түрмеде отыруы керек. Оның істеген істері үшін моральдық шығын өте аз берілді. Мен қызымды өмір бойы емдеуім керек. Оның алған жан жарасы ешқашан емделмейді ғой. Сот үкімін әділетсіз деп есептеймін», — деді ЭК тілшісіне қыздың анасы.
Сот үкімімен белгілі құқыққорғаушы Дина Таңсәрі де келіспейді. Соттың педофилге неге 15 жыл бергенін түсінбейтінін айтты.
ЭК осыған дейін Атырауда өгей әкенің қызын жеті жыл бойына зорлап келгенін хабарлаған болатын.
