Қоғамның мызғымас тірегі – отбасы. Әрбір мемлекеттің тұрақтылығы мен өркендеуі ең алдымен оның азаматтарының отбасындағы ахуалына, тәрбиесіне және құндылықтарға деген көзқарасына байланысты. Осы тұрғыдан алғанда, мерейлі отбасы – әділетті қоғам құрудың негізі екені сөзсіз.
Қазақ халқы «Отан – отбасынан басталады» деп бекер айтпаған. Өйткені, тұлғаның алғашқы тәрбие ошағы – оның отбасы. Міне, осы ортада бала сүйіспеншілікке, әділдікке, мейірім мен жауапкершілікке үйренеді. Ата-ананың өнегесі мен тәрбиесі – баланың болашақтағы мінез-құлқы мен өмірлік ұстанымдарының іргетасы.Әділетті қоғам орнату үшін де әрбір азаматтың бойында адалдық, әділдік, еңбекқорлық, адамгершілік сияқты асыл қасиеттер болуы шарт. Ал бұл қасиеттердің барлығы ең әуелі отбасында қалыптасады. Мерейлі отбасы осы құндылықтардың нақты көрінісі. Мұндай отбасыларда ұрпаққа дұрыс бағыт-бағдар беріледі, ұлттық тәрбие мен адамгершілік ұстанымдар берік сіңіріледі.
Ағымдағы жылдың 30 маусым мен 30 шілде күндері аралығында қала аумағында ерте жүктіліктің, ажырасулардың және суицидтің алдын алу мәселелері бойынша халық арасында түсіндіру жұмыстарын жүргізу мақсатында бір айлық ақпараттық-ағартушылық «Мерейлі отбасы – әділетті қоғам» акциясы өткізілді.
Акция аясында «Ерте жүктіліктің алдын алу», «ЖИТС-тің алдын алу – жастар денсаулығының кепілі» тақырыптарында жастармен кездесулер, «Мерейлі отбасы»атты «дөңгелек үстел» отырысы, некесі қиылған жастарға құрмет көрсету шарасы, ұйымдастырылып, тақырыптық бейнебаян әзірленді.
Сонымен қатар, қала тұрғындары арасында «Тұрмыстық зорлық-зомбылыққа жол жоқ!» акциясы шеңберінде қазақ және орыс тілдерінде 600 парақша таратылды. Акцияға ардагерлер, ақсақалдар кеңесі, аналар кеңесі, этномәдени бірлестіктер, үкіметтік емес ұйымдардың өкілдері, білім беру, денсаулық сақтау, құқық қорғау органдарының, әлеуметтік қорғау салаларының мамандары, және «Мерейлі отбасы» ұлттық конкурсының жеңімпаз отбасылары, жастар белсене қатысты.
Биыл жыл ішінде отбасы институтына қатысты жалпы саны 26 іс-шара өткізілді. Бұл бағыттағы жұмыстар әрі қарай да өз жалғасын табады.
Тараз қаласы әкімдігінің ішкі саясат бөлімі
