Бүгін облыста басым бағыттағы дақылдарды әртараптандыру мен олардың өнімділігін арттыру бағытында атқарылып жатқан жұмыстарды таныстыру арқылы тәжірибе алмасу мақсатында семинар кеңесі өтті.
«Егін шаруашылығын әртараптандыру – уақыт талабы» тақырыбында өткен семинарға ауыл шаруашылығы басқармасының басшысы Ербол Жиенқұлов, аудан әкімдерінің орынбасарлары, аудандық ауыл шаруашылығы бөлімінің басшылары, шаруашылық жетекшілері және ғылыми-зерттеу институттарының ғалымдары мен лизингтік компания өкілдері қатысты.
Семинар барысында алдымен қатысушыларға Меркі ауданындағы «Сыпатай батыр» ЖШС-нің қант қызылшасы алқабында қызылша дақылының заманауи агротехникалық іс-шаралары, су үнемдеу технологиялары мен жер асты суларын пайдалану жұмысы таныстырылды. Одан кейін серіктестіктің масақты дақылдар алқабында картоп, жаздық дақылдар мен көкеніс-бақша дақылдарының үздік сорттары және күздік дақылдардың жаңа сорттары мен жоғары өнім алу жолдары көрсетілді.
«Сыпатай батыр» серіктестігінің егіс алқабында өткен семинарда Қазақ егіншілік және өсімдік шаруашылығы ғылыми-зерттеу институтының басқарма төрағасы Шолпан Бастаубаева «Майлы дақылдардың жаңа сорттары және жоғары өнім алу жолдары», Қазақ картоп және көкөніс шаруашылығы ғылыми-зерттеу институтының директоры Теміржан Айтбаев «Картоп және көкөніс-бақша дақылдарының үздік сорттары», Қазақ су шаруашылығы ғылыми-зерттеу институтының ғылыми қызметкерлері Хасан Тәттібаев пен Валерий Тумблерт су үнемдеу технологиялары мен жер асты суларын пайдалану туралы баяндама жасаса, «QZQ FINANCE» ЖШС-нің директоры Равиль Кабдолрахимов «Жаңбырлатып суғару машиналарын және инфраструктураны лизингтеу» бағдарламасы жайлы баяндап, қатысушылар тарапынан қойылған сұрақтарға жауап берді.
Семинарды қорытындылаған ауыл шаруашылығы басқармасының басшысы Ербол Жұмабекұлы «Жалпы мол өнім жинау үшін алдымен ауыл шаруашылығы дақылдарын белгіленген оңтайлы мерзімде себу, жоғары сапалы тұқыммен қамтамасыз ету және агротехникалық іс-шараларды уақытылы орындаудың пайдасы көп. Бүгін су үнемдеу технологиялары мен жер асты суларын пайдалану жұмысы көрсетілді. Осындай озық технологияларды барлық аудандарда кеңінен енгізу бүгінгі күннің талабы. Ол үшін бізде барлық мүмкіншіліктер бар: табиғат және адам ресурстары жетеді, саланы қолдауға қыруар қаржы бөлінуде, оларды пайдалану механизмдері жасалынған. Бүгінгі семинардан сіздер көп жаңалықтар көріп, көңілге келелі жоспарлар түйді деп ойлаймын. Осы орайда, алдағы уақытта егіс алқаптарын ұлғайтып, барынша егістік жерлерді тиімді пайдалануымыз қажет» — деп атап өтті.
