Инвестиция – ел экономикасының негізгі тетігі. Көптеген ауқымды әрі игілігі мол жобалар тиімді инвестициялық салымдардың нәтижесінде жүзеге асады. 2023 жылдың желтоқсан айында Мемлекет басшысы Қасым-Жомарт Тоқаев «Ел экономикасына инвестициялар тарту жөніндегі жұмыстың тиімділігін арттыру жөніндегі шаралар туралы» Жарлыққа қол қойған болатын. Құжат инвестиция тарту жөніндегі жобаларға ерекше өкілеттік беретін болды.
Инвестициялық жобалардың игілігін көріп жатқан өңірлердің қатарында Жамбыл ауданыда да бар. Өңірдегі инвестициялық жобалардың жүзеге асырылуын бақылау мақсатында аудан әкімі Ерлан Қыдыралыұлы бірқатар елді мекенде болды.
Әуелі өңір басшысы Өрнек ауылдық округінде «Момбеков» шаруа қожалығы салып жатқан тауарлы сүт фермасының құрылыс жұмыстарымен танысты. Жобалық құны 2.9 млрд теңгені құрайтын сүт фермасында 612 бас ірі қара малын ұстауға мүмкіндік бар. Бүгінде электр желілері тартылып, 4 корпустың іргетасы қалануда. Мұнда заманауи техникалар арқылы сүт өнімдері өндірілетін болады. Шаруа қожалық төрағасы құрылыс жұмыстарын жыл соңына дейін аяқтауды көздеп отыр.
Келесі кезекте Ерлан Қыдыралыұлы Еңбек ауылында «AzNur Agro» ауыл шаруашылығы өндірістік коорпаративі салып жатқан тауарлы сүт фермасында болды. 400 басқа арналған сүт фермасының жобалық құны – 1,8 млрд теңге. Казіргі таңда «Тұлпар Строй Сервис» жауапкершілігі шектеулі серіктестігімен келісімшарт жасалып, құрылыс жұмыстары қолға алынған. Яғни, іргетасты толық аяқталған. Тіректерге арналған орындардың 50 пайызы біткен. Бүгінде дәнекерлеу жұмыстары жүруде. Құрылыс жұмыстары ағымдағы жылы аяқталады деп жоспарлануда.
Ақжігіт Жетпісбай,
Жамбыл ауданы әкімінің баспасөз хатшысы
