Күздің алғашқы күнінде Мемлекет басшысы Қасым-Жомарт Кемелұлы Тоқаев Қазақстан халқына Жолдауын жасады. Отанымызға оңай соқпаған жылды өткерген соң, бұл Жолдауда айтылатын дүниелер бізге қызықты болғаны рас. Ең бастысы елдің игілігіне арналған шешімдердің көп боларын жорамалдадық. Күткеніміздей, «Халық бірлігі және жүйелі реформалар-ел өркендеуінің берік негізі» атты Жолдауда жұртшылықтың жүрегін шаттыққа бөлеген көптеген жаңалықтар жария болды.
Ел егемендігінің 30 жылдығы қарсаңында қараша халық көптеген өзгерістерге куә болады. Пандемиядан кейінгі кезеңдегі экономикалық дамуымыз айтылды. «Стратегиялық мақсатымыз — Орталық Азиядағы көшбасшылық рөлімізді күшейту және әлемдік экономикадағы орнымызды нығайту» делінген маңызды құжатта. Мемлекет басшысының «Қарапайым заттар экономикасы» және «Бизнестің жол картасы» бағдарламаларының мерзімін 2022 жылға дейін ұзарту туралы шешімі бұқара көңілін қуантты. Себебі соңғы бағдарлама арқылы 66 мың жоба мемлекет тарапынан қолдау тапқан. Соның нәтижесінде, 150 мыңнан астам жұмыс орны ашылған. Мерзімді ұзарту арқылы халық әл-ауқатын жақсартуға мүмкіндік алады. Жоспарын жүзеге асырып, экономикалық қуатымызды одан әрі арттырады.
Жолдауда көптеген мәселелердің шешімі айтылды, шешуге тиіс тапсырмалар берілді. Тиісінше, ел мүддесіне сай реформалар орын алуы тиіс. Жолдауды қолдаймыз, қуаттаймыз. Елдің ілгерілеуіне тілектестік білдіреміз.
А.СҮЙІМХАНОВА,
Төле би ауылының тұрғыны.
