Сонау арғы сақтар, ғұндар, берісі көктүріктер, Алтын Орда дәуірінен бастап ата-бабаларымыз «бірлік болмай, тірлік болмайтынын» бағамдай білді. Осынау ұлан-ғайыр Ұлы далаға иелік етіп отырмыз десек те, «алтау ала болса, ауыздағы кетеді, төртеу түгел болса, төбедегі келеді» деген халық даналығын кешегіден соң еріксіз еске аламыз және алдыңғы уақытта еш ұмытпауымыз қажет. Қазақ халқы басынан нешеме алмағайып замандарды өткізсе де, Алаштың ақ туының астына ұйыса білген ержүрек, дана халық. Сондықтан қазақ қоғамында бірлік – елдіктің, ұлт болып ұйысып отырудың басты кепілі саналған.
Ел тізгінін қолына ұстаған тұлғалар ел бірлігіне сына түспеу жағына баса көңіл аударды. Сондықтан кешегідей лаңкестік әрекеттерден соң, еңсесі басылған елдің көкірегін қайта көтеріп, елдігімізді нығайтып, тәуелсіздігімізді тұғырландыру жолында, ынтымағымызды сақтап, тұрақтылық пен өркендеудің алғышарттарын тағы бір байыптап, сүзгіден өткізіп жеткізіп отырған Президентіміздің бүгінгі үндеуі – барша қазақстандықтарды жігерлендіре түсті. Әйгілі Әйтеке бидің: «Жігіттің жақсысы – өзі де сөзге тоқтай білген, өзгені де сөзге тоқтата білген» — деуі жайдан жай емес. Жаңа 2022 жылдың қаңтары кешегідей өрбіп, халықтың дүрбелеңге түсіп, Мемлекет басшысының шұғыл әрекеттерге барып, үлкен трагедияның алдын алуы – Перзидентіміз Қ.К.Тоқаевтың сарабдал саясатының нәтижесі.
Мемлекетіміздің әлеуметтік-экономикалық саясатын, оның қорғаныс қабілетін, қауіпсіздігі мен қоғамдық тәртіпті қамтамасыз ету үшін бүгінгі ел Президентінің ҚР Парламент мәжілісіндегі сөйлеген сөзі – ел дамуына, қоғамның жаңаруына арналған бағдарламасы .
Мемлекеттік қызметте зор тәжірибесі бар, мемлекеттік органдарда айтарлықтай сенім ресурсы бар саяси қайраткер Әлихан Смайыловтың еліміздің Премьер-Министрі болып сайлануы да дұрыс шешім деп бірауыздан қолдаймыз.
Сонымен қатар, бүгінгі отырыста Мемлекет басшысы Қ.К.Тоқаевтың болашақ міндеттер мен одан әрі дамудың жаңа перспективаларын белгілеуі, жаңа реформалар мен міндеттерді орындауға дайын екендігін көрсетуі – ел сенімін нығайта түсті.
Президенттің: «Мемлекеттік билік жүйесі «қатемен жұмыс» істеуі керек» дегені – көрегендік. Мемлекет басшысы құқық қорғау құрылымдарының жұмысына шұғыл түзету енгізу қажеттігіне ерекше назар аударды. Яғни, төтенше жағдай кезінде үйлестірілген іс-қимылды қамтамасыз ету мақсатында құқық қорғау жүйесін толық жаңғырту және қайта құрылымдау қажет деп көрсетті. Дәл осы позицияны бүгінгі таңда Қазақстанның барлық азаматы өзінен бастап ұстанса – кешегі күнгі зобалаң қайтып орнамаса керек.
Сонымен қатар: «Ең алдымен, еліміздің жаңа экономикалық тұғырын қалыптастыруды мықтап қолға алу қажет. Экономикалық саясатымыздың мақсаты – айқын. Бұл – заман талабына сай әлеуметтік бағдары бар нарықтық экономика құру және дамыту», — деп көрсетті Президент өз сөзінде. Экономикасы тұрақтанған, дамыған елдің болашағы да жарқын болары анық.
Қорыта айтқанда, жеке адам мен мемлекет арасындағы қатынастарды дамытуға қарай жасалған әрбір тиімді қадамның тек өркендеуге жол ашатыны анық. Бірлік пен ынтымақ — Ұлттық келісімді, Дінаралық төзімділікті және Рухани құндылықтарды сақтап, қоғамдағы тұрақтылықты қамтамасыз ету үшін аса қажет, Сондықтан қазіргі заманда бұл әрбір қазақстандықтың азаматтық парызы болуы тиіс.
Мемлекет басшысының бүгінгі ҚР Парламент мәжілісіндегі ұсынған бағдарламасын Халықаралық Тараз инновациялық институтының қызметкерлері мен студент-жастары толық қолдайды, сонымен қатар, жүргізіп отырған сарабдал саясатына толық сенім артады. Жаңа Қазақстан құруға баршамыз атсалысайық!
Халықаралық Тараз инновациялық институтының ректоры,
ф.ғ.д., профессор, Жамбыл облыстық мәслихатының депутаты ЕРБОЛАТ САУРЫҚОВ
