Ел пікірі ескерусіз қалмайды

Көтерілген мәселеге байланысты аудан әкімі Қанатбек Мәдібек шұғыл әрекет етіп, құзырлы орган және тиісті бөлім басшыларын, ардагерлерді, қаладағы такси қызметімен айналысатын жүргізушілердің лидерлерінің басын қосып, жоспардан тыс жиын өткізді.

Бұған дейін аудан әкімшілігі тарапынан аудандық полиция бөлімі басшысына қала ішінде құдық қақпақтарының жиі ұрланатындығы жайында бірнеше рет хат та жолданған.

Сонымен қатар, қала әкімі мен ардагерлерден құрылған арнайы топ жыл басында темір қабылдайтын кәсіпкерлермен кездесіп, ұрланған құдық қақпақтарын қабылдамау жайында түсіндіру жұмыстарын жүргізген. Басқосуда осы және бұдан өзге де мәселелер талқыланып, тиісті ұсыныстар айтылды.

— Қалада құдық қақпақтарын ұрлау фактісі жиі орын алып отырғаны рас. Бүгінге дейін 260 дана қақпақ қолды болған.

Осылайша сұғанақ қолдылар әжептеуір шығын келтірген. Бұл мәселеге жан-жақты зерделеу жүргіздік. Қазір ұрланған қақпақтардың орнын толтыруға қаржы бөлініп, жұмыстар атқарылып жатыр.

Тиісті жұмыстар қала әкімдігі және «Игілік» мекемесі тарапынан жасалатын болады, — деген Қанатбек Қайшыбекұлы бұл бағытта бақылауды күшейту қажеттігін ескертті.

Құдық қақпақтарын қалпына келтіру жұмыстарының жалғасып жатқандығын алға тартқан «Игілік» мекемесінің директоры Рашид Сейдалиев: -Мекеме тарапынан бүгінге дейін 123 қақпақты орнына қойдық. Қалғаны бөлінген қаражат есебінен орналастырылады,-деді.

Жалпы, құдық қақпақтарын ұрлау фактісі негізінен түнде ел жатып, көшеде адам сирегенде орын алады. Ұрылар қақпақты темір қабылдаушыларға небәрі екі-үш мың теңгеге өткізеді.

Оның нарықтағы құны әлдеқайда қымбат. Мұны аудандық полиция бөлімі бастығының бірінші орынбасары М.Оспанов та растайды.

— Біз қаладағы темір қабылдаушылармен жолығып, түсіндіру жұмыстарын жүргіздік. Бұл мәселе ұдайы бақылауымызда. Тұрғындарды алаңдатып отырған түйіткілді шешуге барлығымыз атсалысайық.

«Жұмыла көтерген жүк жеңіл» деген. Барлығымыз атсалысып, көмегімізді берсек, мәселенің де реттелуі оңайға түседі,-деген М.Оспанов ұрылардың жазасыз қалмайтындығын жеткізді.

Ал, аудан прокуроры құдық қақпақтары ұрлығының алдын алу үшін темір қабылдаушылармен түсіндіру жұмыстарын күшейтіп, керек болған жағдайда жұмыс жасауға берілген құжаттарын тексеру қажеттігі туралы ойын ортаға салды.

Жиын барысында аудандық ардагерлер кеңесінің төрағасы Жұмабек Әсемов, аудандық билер кеңесінің төрағасы Сәулембай Әбсадықұлы, еңбек ардагері Базылхан Тоқтыбаев орын алып жатқан жағдайға байланысты пікірлерін білдірді.

Жиында бұдан бөлек, қаларалық тақси тұрағы жайында да сөз болды. Аудандық орталық аурухана маңындағы Таразға қатынайтын такси тұрағы «қызыл сызықта» орналасқан.

Әдетте «қызыл сызық» құрылыс шекарасын реттеу үшін қолданылатындықтан, жауапты мамандар тұрақтың орнын ауыстыру керек деп есептейді. Бұл шешімге такси жүргізушілерінің өз уәжі бар. Аудан әкімі бұл мәселе назарда болатындығын, алдағы уақытта ретке келтіретіндігін жеткізді.

Кездесуде сонымен қатар, Ақан сері көшесі бойындағы бетоны ажырап, темірі майысқан көпірдің жағдайы мен қала көшелеріне бейнебақылау камераларын орнату жайы сөз болды.

Алдағы уақытта көшелерге бақылау камералары орнатылатын болады. Бұл мақсатта қажетті қаражат та бөлінген. Сондай-ақ, қалада 8 көпір жаңартылып, 6 көшеге құрылыс жұмыстары жүргізілмек. Бұл туралы аудан әкімі айтып өтті.

Жиынды қорытындылаған Қанатбек Қайшыбекұлы: -Тұрғындар тарапынан білдірілген ұсыныс-тілектерді жауапсыз қалдырмаймыз. Қабылдауға келушілер үшін уақыт бөлуге әзірміз.

Жұмысымызды елдің игілігіне арнауымыз керек. Бүгін бірқатар мәселе көтерілді. Ендігі ретте осы түйткілдерді бір болып шешуге атсалысайық,-деді.