Ел егемендігінің 30 жылдық белесінің астарында сан ғасырлық тарихымыз жатқаны ақиқат. Сондықтан үздіксіз, үзіліссіз алға жылжыған тарих көшімізде елді ел етуге бағытталған оқиғалар мен сол жолда тер төккен тұлғаларымызды қалай дәріптесек те жарасымды. Жалпы тарихымызда Алаш қозғалысының, Алаш қайраткерлерінің орны ерек.
Елбасымыз Н.Ә.Назарбаевтың өзі “Алаш зиялылары… Сол айтулы есімдердің білімдарлық һәм азаматтық тәлімдерінде кейде көріне бермейтін де арналар бар. Оның бағасын ұрпақтары, бүгінгі қазақ зиялылары беруге тиіс” деген болатын. Демек біз де ұстаз ретінде өскелең ұрпаққа ұлт мақтандарының
ілкімді істерін үлгі етуіміз керек.
Алаш қайраткерлерінің ішінде аты сирек аталатын тұғырлы тұлға Халел Ғаббасовтың есімін қайта жаңғыртып, өмір жолы, халыққа арнаған қызметі мен еңбегін шәкірттеріме таныстырдым. Халел Ғаббасов – қарапайым қазақ ауылында дүниеге келіп, ауылдан білім алып, өзінің еңбек жолын қарапайым қызметтен бастап, Алаш партиясының қатарына алынып, елге көптеген еңбек сіңірген. Сол уақытта И.Сталинмен жеке жүздесіп, қазақ елінің жағдайын айтқан азаматтың бірі. Бірегейі десек те артық емес.
Міне, ел бағына туған айтулы азаматтың атын естігеннен қызығушылық танытып, зерттеумен айналысуды жөн көрген оқушым Еркебұлан Қырғызбай тың мәліметтер жинақтап, ғылыми жобасын қорғап, облыстан жүлделі 3-орынды алды. Бұл — мен үшін, әрі мектеп үшін үлкен мақтаныш, абырой.
Зерттеудің жаңалығы да жоқ емес. Халел Ғаббасовтың Алаш партиясының ұлттық бағдарламасын
құрған азаматтардың бірі екендігін білдік. Бұған қоса, Мәскеу мемлекеттік университетінің физика-математика мамандығын алтын медальмен бітірген тұңғыш қазақ болғандығын да айта аламыз.
Азаттық пен бейбітшілік жолында күрескен Алаш тұлғаларының орны ерекше. Алаш мұрасы – тәуелсіздіктің орнауымен ортамызға оралған мол тарихи, һәм рухани қазына.
Гүлзада СЕРІКБАЕВА,
М.Әуезов атындағы орта
мектептің тарих пәнінің мұғалімі.
